Read ქართული ბიბლია, სრული ვერსია Job 23 Bible Online

Job 23 - ქართული ბიბლია, სრული ვერსია bible

Job 23

¹მაშინ მიუგო მას იობმა და თქვა:

²„დღესაც მწარე ჩივილია ჩემი სიტყვა; მისი ხელი ძიმედ მაწევს ჩემი კვნესის მიუხედავად.

³ნეტავი მაცოდინა, სად ვიპოვო იგი და მიმაღწევინა მის სამყოფელამდე,

⁴წინ დავუდებდი ჩემს სარჩელს და საბუთებით ავივსებდი პირს.

⁵გავიგებდი სიტყვებს, რასაც მომიგებდა, და მივხვდებოდი, რასაც მეტყოდა.

⁶თავისი დიდი ძალით ხომ არ გამიმართავდა პაექრობას? არა! მხოლოდ ყურს დამიგდებდა.

⁷იქ მართალი შეძლებდა თავის მართლებას მის წინაშე — და მე სამუდამოდ დავიხსნიდი თავს მსაჯულისაგან.

⁸აჰა, წინ მივდივარ — და იგი არ ჩანს, უკან მივდივარ, კვლავაც ვერ ვხედავ.

⁹მარცხნივ ვეძებ, და ვერ ვხედავ, მარჯვნივ შევბრუნდები და კვლავ დაფარულია.

¹⁰მაგრამ მან იცის ჩემი გზა-კვალი, და როდესაც გამომცდის, ოქროსავით გამოვალ.

¹¹ჩემი ტერფი ჩაეჭიდა მის კვალს, მის გზას ვიცავდი განუხრელად.

¹²მის ბაგეთა მცნებებისგან არ გადამიხვევია, მისი პირის სიტყვებს საკუთარზე მეტად ვიცავდი.

¹³მაგრამ იგი უცვლელია და ვინ შემოაბრუნებს მას? რასაც მისი ხელი მოისურვებს, იმას აკეთებს.

¹⁴რადგან ის აღასრულებს, რაც დაადგინა ჩემთვის, და მრავალი ასეთი განზრახვა აქვს მას.

¹⁵ამიტომ ვკრთი მის წინაშე, ჩავუკვირდები და მეშინია მისი.

¹⁶ღმერთმა დააძაბუნა ჩემი გული და ყოვლადძლიერმა შემაძრწუნა მე.

¹⁷მაგრამ სიბნელემ ვერ მომკვეთა და წყვდიადმა არ დამფარა მე.