Read ქართული ბიბლია, სრული ვერსია Job 27 Bible Online

Job 27 - ქართული ბიბლია, სრული ვერსია bible

Job 27

¹კვლავ განაგრძო იობმა თავისი სათქმელი და თქვა:

²„ვფიცავ ღმერთს, რომელმაც წამართვა სამართალი, და ყოვლადძლიერს, რომელმაც სული გამიმწარა.

³რადგან, ვიდრე ჩემი სუნთქვა ჩემშია და ღვთის სული ჩემს ნესტოებშია,

⁴ჩემი ბაგეები არ იტყვიან ტყუილს და ჩემს ენას არ დასცდება სიცრუე.

⁵ღმერთმა დამიფაროს, ვთქვა, რომ მართლი ხართ! სიკვდილამდე არ განვიშორებ ჩემს უმწიკვლოებას!

⁶ჩემი სიმართლე მტკიცედ მიჭირავს და არ გავუშვებ ხელს. არ გავუმტყუნებივარ ჩემს გულს ჩემი დღე და მოსწრება.

⁷მტერი ჩემი იყოს ურჯულოსავით, და მოწინააღმდეგე ჩემი უკეთურივით.

⁸რადგან რა არის უღვთოს იმედი, როცა ღმერთი მოიკვეთს მას, როდესაც ღმერთი წარსტაცებს სულს?

⁹განა შეისმენს მის ღაღადს ღმერთი, როცა მას გასაჭირი ეწევა?

¹⁰ინეტარებს განა ყოვლადძლიერში და ღვთის ხსენებაში იქნება გამუდმებით?

¹¹მე თქვენ გასწავლით ღმერთის ხელის შესახებ, რაც ყოვლადძლიერთან არის, არ დავფარავ.

¹²აჰა, თქვენ ყველას ნანახი გაქვთ და მაშ რაღად ლაპარაკობთ ასე?

¹³ასეთია ურჯულო კაცის ხვედრი ღმერთთან, და მტარვალთა ხვედრი, ყოვლადძლიერისაგან რომ ერგებათ:

¹⁴თუ ვაჟები გაუმრავლდება, მხოლოდ მახვილისათვის, და მისი შთამომავალნი პურით ვერ გაძღებიან.

¹⁵მის შთამომავალს სიკვდილი დაასამარებს, და მათი ქვრივები ვერ დაიტირებენ მათ.

¹⁶თუნდაც მტვერივით დააგროვოს ვერცხლი და თიხასავით დააგროვოს სამოსი,

¹⁷ის კი მოამზადებს, მაგრამ მართალი შეიმოსავს, ვერცხლი კი უდანაშაულოს ერგება წილად.

¹⁸ობობასავით იშენებს სახლს, და დარაჯივით იკეთებს ქოხს.

¹⁹წვება მდიდარი და არაფერი აკლია, თვალებს გაახელს და აღარაფერი აქვს.

²⁰დაატყდება საშინელებანი ნიაღვარივით, და ღამით გრიგალი გაიტაცებს მას.

²¹წაიღებს მას აღმოსავლეთის ქარი, და წარხვეტს მას მისი ადგილიდან.

²²და მოისვრის მას და არ შეიბრალებს. განა გაექცევა მის ხელს?

²³ხალხი ტაშს შემოჰკრავს მის გამო და სტვენას დაუწყებს მას თავისი ადგილიდან.