Read ქართული ბიბლია, სრული ვერსია Job 28 Bible Online

Job 28 - ქართული ბიბლია, სრული ვერსია bible

Job 28

¹ვერცხლს საბადო აქვს და ოქროს ადგილი, სადაც წმენდენ მას.

²რკინას მიწიდან იღებენ, სპილენძს კი მადნიდან ადნობენ.

³ზღვარი დაუდო ადამიანმა ბნელს და ქვეყნის კიდემდე ეძებს მადანს წყვდიადსა და ბნელში.

⁴გათხარა მაღაროები ხეობაში, შორს, უკაცრიელ, მივიწყებულ ადგილებში. გამოკიდებულნი არიან მემაღაროელები ხალხისგან შორს და ქანაობენ იქ.

⁵ხოლო მიწა — მისგან აღმოცენდება პური, მისი ქვეშეთი კი ამობრუნებულია, თითქოს ცეცხლისგან.

⁶მისი ქვები საფირონის ადგილია და მისი მტვერი ოქროს შემცველია.

⁷ის გზა არ იცის არც ერთმა მტაცებელმა ფრინველმა, და შევარდნის თვალსაც არ დაუნახავს.

⁸ამაყ მხეცებს იქ ფეხი არ დაუდგამთ, ლომს მასზე არ გაუვლია.

⁹ადამიანი კაჟზე იწვდის ხელს, მთლიანად აყირავებს მთებს.

¹⁰კლდეებში არხები გაჰყავს და ყოველივე ძვირფასს სჭვრეტს მისი თვალი.

¹¹მდინარეთა დინებას აკავებს, და დამალული სინათლეზე გამოაქვს.

¹²მაგრამ სად მოიპოვება სიბრძნე? და სად არის გონების ადგილი?

¹³არ იცის მისი ფასი ადამიანმა, და ცოცხალთა ქვეყანაში არ მოიპოვება ის.

¹⁴უფსკრული ამბობს ‘ის ჩემში არ არის!’ და ზღვაც ამბობს: ‘ჩემთან არ არის!’

¹⁵არ გაიცვლება ხალას ოქროში, და არ აიწონება ვერცხლი მის საფასურად.

¹⁶არ შეფასდება ოფირის ოქროდ, არც ძვირფასი ონიქსითა და საფირონით.

¹⁷ვერ გაუსწორდება მას ოქრო და ბროლი, და ვერც ბაჯაღლოს ჭურჭელში გაიცვლება.

¹⁸მარჯანი და ბროლი არც არის სახსენებელი, სიბრძნის მოხვეჭა მარგალიტთა უმჯობესია.

¹⁹ვერ გაუსწორდება მას ქუშის ტოპაზი, ხალასი ოქროთი ვერ შეფასდება.

²⁰საიდან მოდის სიბრძნე? ან სად არის გონების ადგილი?

²¹იგი დამალულია ყოველი ცოცხალის თვალთაგან, და დაფარულია ცის ფრინველთაგან.

²²აბადონი და სიკვდილი ამბობენ: ‘ყური მოგვიკრავს მისთვის!’

²³ღმერთმა იცის მისი გზა და მან უწყის მისი ადგილი,

²⁴რადგან ის გაჰყურებს ქვეყნის კიდეებს, და ჭვრეტს მთელ ცისქვეშეთს.

²⁵როდესაც ქარს წონას უწესებდა იგი და წყალს საწყაოთი წყავდა,

²⁶როდესაც წვიმას წესს უდებდა და მეხისცემას — გზა-სავალს,

²⁷მაშინ იხილა იგი და გამოაცხადა, დაადგინა და გამოიკვლია,

²⁸და უთხრა ადამიანს: ‘ჭეშმარიტად, უფლის შიშია სიბრძნე და ბოროტისაგან განრიდებაა გონიერება.’“