Read ქართული ბიბლია, სრული ვერსია Job 30 Bible Online

Job 30 - ქართული ბიბლია, სრული ვერსია bible

Job 30

¹ახლა კი დამცინიან ჩემზე უმცროსები, რომელთა მამებსაც ჩემი ფარის ძაღლებშიც კი არ გავრევდი.

²რისთვის მინდა მათი ხელების ძალა? ძალგამოცლილები,

³სიდუხჭირითა და შიმშილით ღონემიხდილნი გარბიან გვალვიან ტრამალებში, უდაბნოსა და ხრიოკებში.

⁴მწარე ბალახებს წიწკნიან ჯაგებთან და წნორნარის ფესვი მათი პურია.

⁵ხალხიდან აძევებენ მათ, და როგორც ქურდს, ისე მიჰკივიან;

⁶აწყდებიან ხევ-ხუვებს, მიწის მღვიმეებს და კლდის ნაპრალებს.

⁷ბუჩქებს შორის ყროყინებენ სახედრებივით, ჯაგნარებში შეყუჟულან, —

⁸ძენი უგუნურთა და ძენი უსახელოთა, ქვეყნიდან განდევნილნი.

⁹ახლა კი გავხდი მათი სამღერელი და მათი საანდაზო.

¹⁰მიზიზღებენ, გამირბიან და ჩემი სახის წინ ფურთხს არ ზოგავენ.

¹¹რადგან მან ახსნა ჩემი საბელი, პირწინ დამიგდეს ჩემი აღვირი.

¹²მარჯვნივ ბრბო აღმიდგა, ფეხი დამიბრკოლეს, ჩემს წინააღმდეგ წარმართეს თავიანთი დამღუპველი გზები.

¹³მათ აანგრიეს ჩემი ბილიკი, სარგებლობენ ჩემი უიღბლობით, და არავინ აკავებს მათ.

¹⁴როგორც ფართე მოედანზე, ისე მოექანებიან ქარიშახლივით.

¹⁵საშინელებანი დამატყდა თავს, ქარივით მიქრის ჩემი დიდება და ღრუბელივით გადავიდა ჩემი კეთილდღეობა.

¹⁶აწ ჩემში დაიღვარა ჩემი სული, ჩამიგდეს ხელში გაჭირვების დღეებმა.

¹⁷ღამ-ღამობით ძვლები მტეხავს, და ტკივილი, მე რომ მწიწკნის, არ მიამდება.

¹⁸ტანჯვით ვიხდი სამოსს, კვართის საყელოსავით მიჭერს.

¹⁹მისროლა ლაფში და დავემსგავსე მტვერსა და ნაცარს.

²⁰შველას გთხოვ და პასუხს არ მაძლევ. მე ვდგავარ და შენ თვალს არ მაცილებ.

²¹სასტიკი გახდი ჩემს მიმართ, და მდევნი მე შენი ხელის ძალით.

²²ქარზე შემომსვამ, მაიძულებ, გავინავარდო. მაცამტვერებ ქარის ღრიალში,

²³ასეა, ვიცი, სიკვდილისკენ წამიყვან, ყოველი ცოცხალის შესაკრებელი სახლისკენ.

²⁴ნანგრევებში მყოფს ხელს არვინ უწვდის, დაღუპვის პირას ვინც ითხოვს შველას.

²⁵განა არ მიტირია ბედშავზე? სული არ შემწუხებია გაჭირვებულზე?

²⁶მაგრამ როდესაც სიკეთის იმედი მქონდა, ბოროტება მეწია, ნათელს ველოდი და ბნელი მეწია,

²⁷გულ-ღვიძლი მიდუღს და არ ცხრება: ტანჯვა-წამების დღეები დამიდგა.

²⁸ჩაშავებული დავიარები, უმზეოდ; კრებულში ვდგავარ და შველას ვითხოვ.

²⁹ტურებს ძმად გავუხდი და მეგობრად სირაქლემებს.

³⁰კანი გამიშავდა და ძვლები მივარვარებს სიცხისაგან.

³¹გოდებად იქცა ჩემი ქნარი, და მოტირალთა ხმად — ჩემი სალამური.