Read ქართული ბიბლია, სრული ვერსია Job 34 Bible Online

Job 34 - ქართული ბიბლია, სრული ვერსია bible

Job 34

¹და განაგრძო ელიჰუმ და თქვა:

²„ისმინეთ, ბრძენნო, ჩემი სიტყვები, მცოდნენო, ყური დამიგდეთ!

³რადგან ყური გამოცდის სიტყვებს, როგორც სასა გემოს უგებს საკვებს.

⁴ავირჩიოთ, რაც სამართლიანია. ჩვენს შორის გავარკვიოთ, რა არის კეთილი.

⁵რადგან იობმა თქვა: ‘მართალი ვარ და ღმერთმა წამართვა ჩემი სამართალი.

⁶ტყუილი ვთქვა ჩემს სამართალზე? მოუშუშებელია ჩემი იარა, თუმცა უდანაშაულო ვარ!’

⁷ვინ არის იობის მსგავსი კაცი, დაცინვას წყალივით რომ სვამდეს?

⁸ავისმოქმედთა გუნდს რომ მისდევდეს? და უკეთურ ხალხთან იაროს?

⁹რადგან მან თქვა: ‘არაფრად არგია კაცს, რომ ღმერთს აამოს.’

¹⁰ამიტომ ისმინეთ ჩემი, გულისხმიერნო კაცნო! შორს არის ღმერთი ბოროტებისაგან და ყოვლადძლიერი უსამართლობისაგან!

¹¹რადგან საქმისამებრ მიუზღავს ადამიანს, და კაცს მისი გზისამებრ მიაგებს.

¹²ჭეშმარიტად, ღმერთი არ იქმს ბოროტს და ყოვლადძლიერი არ ამრუდებს სამართალს!

¹³ვინ ჩააბარა მას მიწა? ან ვინ მიანდო მას მთელი სამყარო?

¹⁴თუ თავისკენ მიაპყრობს თავის გულისყურს, უკანვე წაიღებს თავის სულსა და სუნთქვას,

¹⁵ერთიანად გაწყდება ყოველი ხორციელი და ადამიანი მტვრად მიიქცევა.

¹⁶თუ შეგიძლია, ისმინე ეს, ყური უგდე ჩემი სიტყვების ჩქამს!

¹⁷ნუთუ სამართლის მოძულე იგანმგებლებს? და ნუთუ ბრალს დასდებ ძალმოსილ მართალს?

¹⁸ვინ ეუბნება მეფეს: ‘არამზადავ!’ და დიდგვაროვანს: ‘უკეთურო!’;

¹⁹ვინ არ მიჰკერძავს მთავრებს და მდიდარს ღარიბზე მეტად არ მიიჩნევს, რადგან ყველანი მის ხელთა ქმნილებანი არიან?

²⁰ერთ წამში იხოცებიან ისინი; შუაღამისას ტორტმანებს ხალხი და იღუპება, და წაიყვანენ და მოაშორებენ ძლიერს კაცის ხელის გარეშე,

²¹რადგან მისი თვალები ადამიანის გზებს დასცქერის და ხედავს მის ყოველ ნაბიჯს.

²²არ არსებობს არც ბნელი და არც წყვდიადი, სადაც დაიმალებოდა ავისმოქმედი;

²³რადგან იგი არ უწესებს კაცს ვადას ღმერთთან სამსჯავროზე მისასვლელად.

²⁴ის მუსრავს ძლიერთ განუკითხავად და სხვებს აყენებს მათ ნაცვლად,

²⁵რადგან იცის მათი ნამოქმედარი. ღამით დაამხობს მათ და შეიმუსრებიან;

²⁶უკეთურთ დალახვრავს სხვათა თვალთა წინ.

²⁷რადგან განუდგნენ მას და არ შეიმეცნეს მისი გზები.

²⁸მასთან მივიდა ღატაკთა ღაღადი, და დაჩაგრულთა ღაღადი მისწვდა მას.

²⁹როცა ის დუმს, ვინ არის მისი ბრალმდებელი? როცა სახეს იფარავს, ვინ არის მისი მხილველი? იქნება ეს ერი, თუ ერთი კაცი? —

³⁰რათა არ იმეფოს უღვთო ადამიანმა, ხალხის მახეში გამბმელმა.

³¹ვინმეს თუ უთქვამს ღმერთისათვის: ‘მე მოვიხადე სასჯელი, აღარ შევცოდავ,

³²შენ მასწავლე, რასაც ვერ ვხედავ. თუ უკეთურება ჩამიდენია, მეტს აღარ ვიზამ’.

³³განა შენი განსჯით უნდა მიუზღავდეს იგი, რადგან შენ მას ეწინააღმდეგები? შენ უნდა აირჩიო და არა მე. მაშ თქვი, რაც იცი.

³⁴მეტყვიან გულისხმიერი კაცები და ბრძენნი, მე რომ მისმენენ:

³⁵‘უაზროდ ლაპარაკობს იობი და მის სიტყვებს გონიერება აკლია.’

³⁶ერთი ბოლომდე გამოიცდებოდეს იობი, ავკაცთა მსგავსად რომ პასუხობს!

³⁷რადგან თავის ცოდვას უმატებს ამბოხს, ხელს ხელზე შემოჰკრავს ჩვენს შორის და სიტყვას ამრავლებს ღვთის წინააღმდეგ!“