Read ქართული ბიბლია, სრული ვერსია Job 36 Bible Online

Job 36 - ქართული ბიბლია, სრული ვერსია bible

Job 36

¹და განაგრძო ელიჰუმ და თქვა:

²„ცოტა დამაცადე და გაჩვენებ, რადგან კიდევ არის ღმერთის სახელით სათქმელი სიტყვები.

³შორიდან წამოვიღებ ჩემს აზრს და ჩემს გამჩენს მივაგებ სიმართლეს,

⁴რადგან ნამდვილად არ არის ცრუ ჩემი სიტყვები, ცოდნაში სრული შენს წინაშეა.

⁵აჰა, ძლიერია ღმერთი, და არავინ სძულს. ის სიბრძნის ძალითაა ძლიერი.

⁶იგი ცოცხალს არ გაუშვებს უკეთურს, და ჩაგრულთ მიაგებს სამართალს;

⁷თვალს არ აშორებს თავის მართალს და მეფეებთან ერთად ტახტზე სვამს სამარადისოდ, და აღზევდებიან ისინი.

⁸და თუ მათ ბორკილები ადევთ და ტანჯვის საკვრელით არიან შეკრულნი,

⁹განუცხადებს მათ თავიანთ ნამოქმედარს და დანაშაულს, რადგან გაამპარტავანდნენ ისინი.

¹⁰გაუხსნის მათ ყურებს შეგონებისთვის და ეტყვის, რათა სიავისგან უკუმოიქცნენ.

¹¹თუ შეისმენენ და დაემორჩილებიან, დღეებს სიკეთეში დაასრულებენ და წლებს — ნეტარებაში.

¹²ხოლო თუ არ შეისმენენ, მახვილით დაეცემიან და უგუნურებაში ამოხდებათ სული.

¹³გულმრუდნი აღძრავენ რისხვას, შველას არ ითხოვენ მისგან, როდესაც ბორკილს ადებს მათ.

¹⁴სიჭაბუკეშივე კვდება მათი სული, და მათი სიცოცხლე თავდება სირცხვილში.

¹⁵ის იხსნის ტანჯულს მისივე ტანჯვით, და დათრგუნვის ჟამს უხსნის მას ყურებს.

¹⁶და შენც გამოგიყვანდა შეჭირვების პირიდან სიფართოვეში, სადაც არაა სივიწროვე, და შენი სუფრაც სავსე იქნებოდა ცხიმით.

¹⁷შენ კი სავსე ხარ უკეთურთა სასჯელით, მსჯავრი და სამართალი დაგაცხრა შენ.

¹⁸ფრთხილად იყავი, გულისწყრომამ სასაცილო არ გაგხადოს, დიდმა გამოსასყიდმა არ გადაგხაროს.

¹⁹ყვირილი გიშველის განა გასაჭირში, ან მთელი შენი ძალისხმევა?

²⁰ნუ ინატრებ იმ ღამეს, როცა ხალხები აიყრებიან თავიანთი ადგილებიდან,

²¹იფრთხილე, არ მოიქცე ავკაცობისკენ, რადგან ამით სატანჯველს ირჩევ.

²²აჰა, ღმერთი მაღალია თავისი ძლიერებით, ვინ არის მისი მსგავსი მოძღვარი?

²³ვის დაუწესებია მისთვის გზა და ვის უთქვამს: ‘უკეთურება გაქვს ჩადენილი?’

²⁴გახსოვდეს, რომ უნდა ადიდო მისი საქმენი, რომელთაც ხალხი უგალობს.

²⁵ყველა ადამიანს უნახავს ისინი, კაცი შორიდანვე ამჩნევს მათ.

²⁶აჰა, მაღალია ღმერთი და ვერ შევიცნობთ მას, მის წელთა რიცხვი აურაცხელია.

²⁷ის აკავებს წყლის წვეთებს, და ისინი ნისლიდან ასხურებენ წვიმას,

²⁸ღრუბლები ღვრიან მას, უხვად ესხურება ადამიანს.

²⁹თუ მიხვდება ვინმე ღრუბლების განფენილობას, მისი კარვის ჭექა-ქუხილს?

³⁰აჰა, ის განფენს მასზე თავის ელვას, დაფარავს იგი ზღვის ფესვებს,

³¹რადგან ამით მართავს ხალხებს, უხვად იძლევა საზრდოს.

³²ხელებს ელვით იფარავს, უბრძანებს მას სამიზნისაკენ.

³³მისი ქუხილი ამას იუწყება, და ჯოგიც გრძნობს წინასწარ გრიგალის ამოვარდნას.