Read ქართული ბიბლია, სრული ვერსია Job 39 Bible Online

Job 39 - ქართული ბიბლია, სრული ვერსია bible

Job 39

¹თუ იცი ნიამორთა დაბადების ჟამი? თვალს თუ ადევნებ ფურ-ირემთა მშობიარობას?

²აღრიცხავ მათ თვეთა აღვსებას? და თუ იცი ჟამი მათი მოგებისა?

³ჩაიმუხლებენ, დაყრიან ნაშიერთ, შობის ტკივილისგან თავისუფლდებიან;

⁴კაჟდებიან მათი ნუკრები, ველად იზრდებიან, გადიან და აღარ ბრუნდებიან.

⁵ვინ გაუშვა კანჯარი ნებაზე? და ვინ ახსნა კანჯარს საკვრელი?

⁶რომელსაც მე სახლად ტრამალი მივეცი და სამყოფლად — მლაშობი?

⁷ის არად აგდებს ქალაქის გნიასს, არ ესმის მენახირის შეძახილები.

⁸მთებში საძოვრად დაეხეტება და ყოველგვარ სიმწვანეს დაეძებს.

⁹ინებებს გარეული ხარი შენს სამსახურს? თუ გაათევს შენს ბაგაზე?

¹⁰გარეულ ხარს სახნავში თუ შეაბამ აპეურით? თუ დაგიფარცხავს ის ველებს შენს უკან?

¹¹დაენდობი მას, რაკი დიდია მისი ძალა? მიანდობ სამუშაოს?

¹²თუ გჯერა, რომ თესლს დაგიბრუნებს და შენს კალოზე მოგიგროვებს?

¹³შენ მიეცი სირაქლემას მხიარულად მოფრიალე ფრთა და ყანჩას ნაკრტენი და ბუმბული?

¹⁴რადგან ის თავის კვერცხებს მიწაზე ტოვებს და მათ მტვერში ათბობს,

¹⁵და ავიწყდება, რომ ფეხით შეიძლება დალეწონ და ველის მხეცებმა გათელონ.

¹⁶ულმობლად ექცევა ის თავის ბარტყებს, თითქოს მისები არ იყვნენ, ამაო გარჯა არ ენაღვლება.

¹⁷რადგან ღმერთმა დაავიწყა მას სიბრძნე და წილად არ არგუნა გონება.

¹⁸რაჟამს შეიმართება გასაფრენად, დასცინის ცხენსა და მის მხედარს.

¹⁹შენ მიეცი ცხენს ძლიერება? შენ შემოსე ფაფარით მისი კისერი?

²⁰შენ ახტუნავებ მას კალიასავით? მისი მჭახე ჭიხვინი ზარდამცემია!

²¹მიწას თხრის ის ველზე და ხარობს ძლიერებით, და მძლავრად ეგებება იარაღს.

²²შიშს დასცინის და არ კრთის და მახვილისგან პირს არ იბრუნებს.

²³მის თავზე ჩხრიალებს კაპარჭი, ელავს შუბი და ჰოროლი.

²⁴შმაგად და მძვინვარედ ნთქავს მიწას და არ წყნარდება საყვირის ხმაზე.

²⁵ბუკის ცემაზე ამბობს: ‘აჰა!’ და შორიდან იყნოსავს ბრძოლას, სარდალთა შეძახილსა და ყიჟინს.

²⁶შენი სიბრძნით არის, ქორი რომ ნავარდობს და სამხრეთისკენ შლის ფრთებს?

²⁷შენი ბრძანებით ფრენს ორბი აღმა და მაღლა იკეთებს თავის ბუდეს?

²⁸კლდეზე ბუდობს და ღამეს ათევს კლდის ქიმსა და სიმაგრეზე.

²⁹იქიდან ეძებს თავის საზრდოს; მისი თვალები შორიდან ჭვრეტენ მას,

³⁰მისი მართვენი სისხლს სვამენ, და სადაც ლეშია, იქ არის ისიც.“