Read ქართული ბიბლია, სრული ვერსია Job 40 Bible Online

Job 40 - ქართული ბიბლია, სრული ვერსია bible

Job 40

¹და მიმართა უფალმა იობს და თქვა:

²„გაბედავს სხვისი შეცდომის მაძიებელი შეედავოს ყოვლადძლიერს? ღმერთის მამხილებელმა პასუხი უნდა გასცეს!“

³მიუგო იობმა უფალს და უთხრა:

⁴„აჰა, არარაობა ვარ მე, რა გიპასუხო? პირზე ხელს ვიფარებ.

⁵ერთხელ ვთქვი და აღარას ვიტყვი მეორედ, და აღარას დავძენ.“

⁶და მიუგო უფალმა იობს ქარიშხლიდან და უთხრა:

⁷„შემოისარტყლე წელი ვაჟკაცურად, შეგეკითხები და მითხარი.

⁸ნუთუ გააუქმებ ჩემს სამართალს, მე გამამტყუნებ, რათა თავად გამართლდე?

⁹ნუთუ ღვთისდარი მკლავი გაქვს, და მისი მსგავსი ხმით შეგიძლია ჭექა?

¹⁰აბა, მოიკაზმე დიდებითა და სიდიადით, შარავანდი და ბრწყინვალება შეიმოსე.

¹¹გადმოაფრქვიე მძვინვარება შენი რისხვისა, დახედე ქედმაღალს და დაამდაბლე.

¹²დახედე ყოველ ქედმაღალს, დაამცირე და გათელე უკეთურნი მათსავე ადგილზე.

¹³ჩამარხე მტვერში ერთიანად, მათი სახე ქვესკნელში მობურე.

¹⁴მაშინ მეც ვაღიარებ, რომ გიხსნის შენი მარჯვენა.

¹⁵აჰა, ბეჰემოთი, შენთან ერთად რომ შევქმენი, ხარივითა ძოვს ბალახს.

¹⁶აჰა, მის წელშია მისი ძალა და მისი ღონე მისი მუცლის კუნთებში.

¹⁷კედარივით დრეკს თავის კუდს, ბარძაყის ძარღვები გადაგრეხილი აქვს,

¹⁸მისი ძვლები ბრინჯაოს მილებია. მისი სახსრები რკინის წნელებივითაა.

¹⁹ის პირველია ღვთის ქმნილებათაგან, მხოლოდ მისი გამჩენი თუ დაჰკრავს მახვილს.

²⁰რადგან მთები აძლევენ საზრდოს, და იქ შეიქცევს თავს ველის ყოველი ცხოველი.

²¹ლოტოსებს ქვეშ გაწოლილა, ლერწმისა და ჭაობის საფარში.

²²ლოტოსები ჩრდილს ჰფენენ მას, გარს ძეწნები ახვევია.

²³აჰა, წყალს სვამს მდინარისას და არ ჩქარობს, არ კრთება, მშვიდადაა, მის პირს იორდანეც რომ მიასკდეს.

²⁴ვინ შეიპყრობს მას? ვინ გაუხვრეტს ცხვირს ჩანგლებით?