Read ქართული ბიბლია, სრული ვერსია Job 42 Bible Online

Job 42 - ქართული ბიბლია, სრული ვერსია bible

Job 42

¹და მიუგო იობმა უფალს:

²„ვიცი, რომ ყველაფერი შეგიძლია, და შენი განზრახვა არ დაბრკოლდება.

³ვინაა ეს, განგებას რომ აბნელებს და არაფერი ესმის? ასე ვლაპარაკობდი და არ გამეგებოდა, ჩემთვის საკვირველზე, და ვერაფერს ვხვდებოდი.

⁴მისმინე და მე ვილაპარაკებ, შეგეკითხები, და მაცოდინე.

⁵ყურმოკვრით მქონდა გაგონილი შენზე, ახლა კი ჩემმა თვალმა გიხილა შენ.

⁶ამიტომ თავს ვიდრეკ და ვინანიებ მტვერსა და ნაცარში.“

⁷და მას შემდეგ, რაც წარმოთქვა უფალმა ეს სიტყვები იობის მიმართ, უთხრა მან ელიფაზ თემანელს: „აღეგზნო ჩემი რისხვა შენს მიმართ და შენი ორი მეგობრის მიმართ, რადგან ჩემი მსახური იობივით წრფელად არ ილაპარაკეთ ჩემზე.

⁸ახლა კი წაიყვანეთ შვიდი ხბო და შვიდი ვერძი, და მიდით იობთან, ჩემს მსახურთან, და აღავლინეთ თქვენთვის სრულადდასაწველი. და ჩემი მსახური იობი ილოცებს თქვენთვის, რადგან მის ლოცვას მივიღებ, რათა თქვენი უტიფრობისამებრ არ მოგექცეთ, რადგან ჩემი მსახური იობივით წრფელად არ ილაპარაკეთ ჩემზე.“

⁹და წავიდნენ ელიფაზ თემანელი, ბილდად შუხელი და ცოფარ ნაყამათელი და ისე მოიქცნენ, როგორც უფალმა უბრძანა მათ. და მიიღო უფალმა იობის ლოცვა.

¹⁰და აღუდგინა უფალმა იობს უწინდელი წარმატება, როცა ილოცა იობმა თავისი მეგობრებისათვის. ორმაგად მიუმატა უფალმა ყოველივე, რაც ებადა იობს.

¹¹და მივიდა მასთან ყველა მისი ძმა და ყველა მისი და, და ყველა მისი უწინდელი ნაცნობ-მეგობარი, და ჭამეს მასთან პური მის სახლში. და მათ უთანაგრძნეს მას და ანუგეშეს ყველა იმ უბედურების გამო, რაც უფალმა მოუვლინა მას, და თითოეულმა მისცა თითო ქესიტა და თითო ოქროს ბეჭედი.

¹²და აკურთხა უფალმა იობის უკანასკნელი დღეები პირვანდელზე მეტად: და ჰყავდა მას 14 ათასი ცხვარი, 6 ათასი აქლემი, ათასი უღელი ხარი და ათასი სახედარი.

¹³და ჰყავდა მას შვიდი ძე და სამი ასული.

¹⁴და დაარქვა ერთს სახელად იემიმა, მეორეს — კეციყა და მესამეს — კერენ-ჰაფუქი.

¹⁵და არ მოიძებნებოდნენ იობის ასულებისთანა ტურფა ქალები მთელს ქვეყანაზე. და მისცა მათ მამამ სამკვიდრო მათ ძმათა შორის.

¹⁶და იცოცხლა იობმა ამის შემდეგ 140 წელი და იხილა მან თავისი შვილთაშვილები, ოთხი თაობა.

¹⁷და მოკვდა იობი დღეებით სავსე.