Read ქართული ბიბლია, სრული ვერსია Job 8 Bible Online

Job 8 - ქართული ბიბლია, სრული ვერსია bible

Job 8

¹მაშინ მიუგო ბილდად შუხელმა:

²„როდემდე ილაპარაკებ ასე? შენი პირიდან გამოსული სიტყვები ცარიელი ქარია!

³ნუთუ ღმერთი გაამრუდებს სამართალს, და ყოვლადძლიერი გაამრუდებს სიმართლეს?

⁴თუ შენმა შვილებმა შესცოდეს მის წინაშე, მან ისინი გადასცა მათსავე ურჯულოებას.

⁵შენ რომ ღმერთი გეძებნა და ყოვლადძლიერს შევედრებოდი,

⁶წრფელი რომ ყოფილიყავი, ახლა იფხიზლებდა ის შენთვის და აღგიდგენდა შენი სიმართლის ადგილს.

⁷და თუ შენი დასაწყისი მცირე იყო, შენი დასასრული დიდად გაიზრდება.

⁸ჰკითხე გარდასულ თაობას და ყურად იღე მამების ნაკვლევი.

⁹რადგან გუშინდელნი ვართ და არაფერი ვიცით, რადგან ჩრდილია ჩვენი დღეები ამ ქვეყანაზე.

¹⁰განა არ დაგმოძღვრავენ და არ გეტყვიან? და გულიდან არ ამოიღებენ სიტყვებს?

¹¹ნესტის გარეშე თუ იზრდება ჭილი? უწყლოდ თუ ამოდის ლერწამი?

¹²იგი ჯერ ნორჩია და მოუჭრელი, და მაინც ყველა ბალახზე ადრე ჭკნება.

¹³ასევეა ყველას ბილიკები, ვინც ღმერთს ივიწყებს. და უღვთოთა იმედი გაქარწყლდება.

¹⁴რადგან წარიკვეთება მათი სასო და მათი იმედი ობობის ქსელს დაემსგავსება.

¹⁵მიეყდნობა თავის სახლს, ის კი ვერ გაუძლებს, მოეჭიდება მას და ვერ დაიჭერს.

¹⁶ცოდვილი ნედლია მზის ამოსვლამდე, ბაღნარზეა გადმოშლილი მისი ყლორტები.

¹⁷ქვების გროვაშია ჩახლართული მისი ფესვები, ქვის ლოდებშია ჩაჭედილი.

¹⁸მაგრამ თუ ამოგლიჯეს თავისი ადგილიდან, ბაღი უარყოფს მას: არასოდეს მინახიხარო.

¹⁹აჰა, ეს არის მისი გზის სიხარული, მიწიდან კი სხვა აღმოცენდება.

²⁰ხედავ, ღმერთი არ მოიძულებს უმანკოს, და არ შეეწევა ბოროტმოქმედებს.

²¹კვლავ აგივსებს პირს სიცილით, და ბაგეებს აგივსებს სიხარულის ყიჟინით.

²²შენი მოძულენი სირცხვილით შეიმოსებიან და ურჯულოთა კარავი აღარ იქნება!“