Read ქართული ბიბლია, სრული ვერსია Psalms 104 Bible Online

Psalms 104 - ქართული ბიბლია, სრული ვერსია bible

Psalms 104

¹ადიდეთ უფალი, მოუხმეთ მის სახელს, აუწყეთ ერებს მისი საქმენი.

²ადიდეთ იგი, უგალობეთ მას, აუწყეთ მისი სასწაულები!

³განდიდდით მისი წმიდა სახელით! გამხიარულდეს გული უფლის მაძიებელთა!

⁴ეძიეთ უფალი და ძლიერება მისი, ეძიეთ პირი მისი მარადის!

⁵გაიხსენეთ მისი საოცარი საქმენი, სასწაულები და მის ბაგეთა მსჯავრნი!

⁶თესლო აბრაამისა, მისი მორჩილისა, ძენო იაკობისა, რჩეულნო მისნო!

⁷ის არის უფალი, ღმერთი ჩვენი; მთელ ქვეყნიერებაზეა მისი სამართალნი.

⁸ახსოვს მარადის აღთქმა თავისი, სიტყვა, რომელიც დაადგინა ათას თაობამდე,

⁹რომელიც დაუდო აბრაამს, რომელიც შეჰფიცა ისააკს.

¹⁰რაც დაუდგინა იაკობს წესად, და ისრაელს — სამარადჟამო აღთქმად.

¹¹უთხრა: „შენ მოგცემ ქანაანის ქვეყანას შენი მემკვიდრეობის წილად.“

¹²როცა ისინი თითზე ჩამოსათვლელნი იყვნენ, ცოტანი და იქაური ხიზნები,

¹³როდესაც გადიოდნენ ერთი ერიდან მეორესთან, ერთი სამეფოდან მეორეში,

¹⁴არავის ანებებდა მათ დაჩაგვრას, და ამუნათებდა მათ გამო მეფეებს:

¹⁵„არ შეეხოთ ჩემს ცხებულებს და ჩემს წინასწარმეტყველებს არაფერი ავნოთ.“

¹⁶და მოუხმო შიმშილს დედამიწაზე და ყოველი სახსარი პურისა შემუსრა.

¹⁷გაგზავნა მათ წინ კაცი, მონად გაიყიდა იოსები.

¹⁸გატანჯეს ბორკილებით ფერხნი მისნი, რკინა მისწვდა მის სულს,

¹⁹ვიდრე ასრულდებოდა მისი ნათქვამი; უფლის სიტყვამ გამობრძმედა იგი.

²⁰გაგზავნა მეფემ და გაათავისუფლა იგი; ხალხთა გამგებელმა გამოიხსნა იგი.

²¹დააყენა თავისი სახლის ბატონად და გამგებლად მთელი თავისი მონაგარისა.

²²რათა მოქცეოდა მის მთავრებს თავისი სურვილისამებრ და განებრძნო მოხუცებულნი მისნი.

²³მაშინ მოვიდა ისრაელი ეგვიპტეში, ხიზანი გახდა იაკობი ქამის ქვეყანაში.

²⁴და ააღორძინა ღმერთმა თავისი ხალხი ფრიად და გაამრავლა მის მტრებზე მეტად,

²⁵მოაქცია მათი გული უფლის ხალხის შესაძულებლად, მის მორჩილთა მიმართ მზაკვრობის განსაზრახად.

²⁶გაგზავნა მოსე, მსახური თვისი, და აარონი, რომელიც ამოირჩია.

²⁷ქმნეს მათში მისი სასწაულები, საოცრებანი მოიმოქმედეს ქამის ქვეყანაში.

²⁸მიავლინა წყვდიადი და იქმნა ღამე, და არ გაურჩებულან მის სიტყვაზე.

²⁹აქცია მათი წყლები სისხლად და დახოცა მათი თევზები.

³⁰აავსო მათი ქვეყანა ბაყაყით, თვით მეფეთა პალატებიც კი.

³¹თქვა და მოვიდა ბუზანკალი, მკბენარი — მთელს მათ საზღვრებში.

³²წვიმის მაგიერ სეტყვა გაუგზავნა, ალმოდებული ცეცხლი — მათ ქვეყანას.

³³მოსრა ვაზი მათი და ლეღვი მათი, და დალეწა ხეები მათ საზღვრებში.

³⁴თქვა და მოვიდა კალია და მგრაგნელი აურაცხელი,

³⁵და გადაჭამეს მთელი ბალახი მათ ქვეყანაში, და გადასანსლეს მთელი ნაყოფი მათი მინდვრისა.

³⁶მოსრა ყოველი პირმშო მათ ქვეყანაში, დასაბამი მთელი მათი ძალისა.

³⁷გამოიყვანა ისინი ვერცხლით და ოქროთი, და მათ ტომებში არავინ იყო უძლური.

³⁸გაუხარდა ეგვიპტეს მათი გამოსვლა, რადგან თავს დაატყდა მათი შიში.

³⁹გადააფარა ღრუბელი საჩრდილობლად და ცეცხლი — ღამის გასანათებლად.

⁴⁰ითხოვეს და გაუგზავნა მწყერი და ზეციური პურით გააძღო ისინი.

⁴¹გახსნა კლდე და გადმოდინდა წყალი, წავიდა ნაკადებად უდაბნოში მდინარედ.

⁴²რადგან გაიხსენა თავისი წმიდა სიტყვა აბრაამის, თავისი მორჩილის, მიმართ.

⁴³გამოიყვანა თავისი ხალხი სიხარულით, რჩეულნი თვისნი ზარ-ზეიმით.

⁴⁴მისცა მათ წარმართთა ქვეყნები, და ნაჯაფი ერებისა დაიმკვიდრეს მათ.

⁴⁵რათა დაიცვან წესები მისი და მის კანონებს დაემორჩილონ. ალელუია!