Read ქართული ბიბლია, სრული ვერსია Psalms 105 Bible Online

Psalms 105 - ქართული ბიბლია, სრული ვერსია bible

Psalms 105

¹ადიდეთ უფალი! მადლი შესწირეთ უფალს, რადგან კეთილია; წყალობა მისი მარადიულია!

²ვის ძალუძს აუწყოს უფლის სიძლიერე, გამოთქვას მისი ქება-დიდება?

³ნეტარ არიან სამართლის დამცველნი და სიმართლის მოქმედნი ყოველ ჟამს!

⁴გამიხსენე, უფალო, შენი ხალხისადმი კეთილგანწყობისას, მომხედე შენმიერი შველით,

⁵რათა ვიხილო სიკეთე შენს რჩეულთა, გავიხარო შენი ერის სიხარულით, და ვიქადო შენს სამკვიდროსთან ერთად.

⁶შევცოდეთ ჩვენს მამებთან ერთად, სიმრუდე და ბოროტება ჩავიდინეთ.

⁷ვერ შეიცნეს ჩვენმა მამებმა ეგვიპტეში შენი სასწაულები, არ გაიხსენეს შენი მრავალი წყალობა და აგიმხედრდნენ ზღვაზე, მეწამულ ზღვაზე.

⁸მაგრამ მან იხსნა ისინი თავისი სახელის გულისათვის, რათა შეეცნოთ ძლიერება მისი.

⁹შეუტია მეწამულ ზღვას და დაშრა, და გაატარა ისინი უფსკრულებში, როგორც უდაბნოში.

¹⁰იხსნა მოძულის ხელიდან და განარინა მტრის ძალისაგან.

¹¹წყალმა დაფარა მათი მტრები, ერთი მათგანიც არ დარჩენილა.

¹²მაშინ ირწმუნეს მისი სიტყვები, იმღერეს მისი ქება.

¹³მაგრამ აჩქარდნენ, დაივიწყეს მისი საქმენი, არ დაელოდნენ მის რჩევას.

¹⁴აჰყვნენ გულისთქმას უდაბნოში და გამოსცადეს ღმერთი უკაცრიელ ადგილას.

¹⁵და შეუსრულა თხოვნა მათი, მაგრამ მოუვლინა სიმჭლევე მათ სულებს.

¹⁶როდესაც შური აღეძრათ მოსეს მიმართ ბანაკში, უფლის წმიდის აარონის მიმართ,

¹⁷გაიპო მიწა და ჩაყლაპა დათანი, და დაფარა ხროვა აბირამისა.

¹⁸მოედო ცეცხლი მათ ხროვას, ალი მოეკიდა ბოროტებს.

¹⁹გააკეთეს ხბო ხორებთან და თაყვანი სცეს ჩამოსხმულ კერპს.

²⁰გაცვალეს თავიანთი დიდება ბალახის მძოველი ხარის გამოსახულებაში.

²¹დაივიწყეს ღმერთი, თავიანთი მხსნელი, დიდ საქმეთა მოქმედი ეგვიპტეში,

²²საოცრებათა მოქმედი ქამის ქვეყანაში, საშინელებათა მეწამულ ზღვაზე.

²³წარმოთქმული ჰქონდა მათი მოსპობა, რომ მოსე, მისი რჩეული, არ დამდგარიყო ნაპრალთან მის წინაშე, რათა გაებრუნებინა მისი რისხვა, და აღარ მოესრა ისინი.

²⁴შემდეგ კი დაიწუნეს ქვეყანა სასურველი, აღარ ირწმუნეს სიტყვები მისი.

²⁵დრტვინავდნენ თავიანთ ბანაკებში, არ უსმენდნენ უფლის ხმას.

²⁶მაშინ ზეაღმართა თავისი ხელი, რომ დაეხოცა ისინი უდაბნოში

²⁷და გაეფანტა მათი ნაშიერი ერებს შორის და განებნია ისინი ქვეყნებში.

²⁸დაუკავშირდნენ ბაყალ-ფეღორს და ჭამეს მკვდრების შესაწირავი.

²⁹განარისხეს თავიანთი მოქმედებით; და თავს დაატყდათ მომსვრელი სენი.

³⁰წამოდგა ფინეხასი და ილოცა, და შეჩერდა მომსვრელი სენი.

³¹ჩაეთვალა მას ეს სიმართლედ თაობიდან თაობამდე, სამარადჟამოდ.

³²განარისხეს მერიბას წყლებზე და დაისაჯა მოსე მათ გამო,

³³რადგანაც სული გაუმწარეს და აჩქარებული სიტყვა გამოთქვა თავისი ბაგეებით.

³⁴არ მოსპეს ერები, როგორც უფალმა უბრძანა მათ,

³⁵აირივნენ წარმართებში და ისწავლეს მათი საქმეები.

³⁶ემსახურებოდნენ მათ კერპებს, რომლებიც მახედ იქცნენ მათთვის.

³⁷სწირავდნენ თავიანთი ძეებს და ასულებს დემონებს.

³⁸დაღვარეს სისხლი უცოდველი, თავიანთ ძეთა და ასულთა სისხლი, რომელიც შესწირეს ქანაანის კერპებს, და შეირყვნა ქვეყანა სისხლით.

³⁹შეიბილწნენ თავიანთი საქმეებით და იმრუშეს თავიანთი მოქმედებით.

⁴⁰მაშინ აღეგზნო რისხვა უფლისა თავის ხალხზე და შესძაგდა მას სამკვიდრო თვისი.

⁴¹ხელში ჩაუგდო ისინი ერებს და გაბატონდნენ მათზე მათი მოძულენი.

⁴²ავიწროებდნენ მათ მტრები, და მოიდრიკნენ მათ ხელქვეით.

⁴³მრავალგზის იხსნა ისინი, მაგრამ ისინი უჯანყდებოდნენ თავიანთი ზრახვებით, და დამდაბლდნენ ბრალით.

⁴⁴და მაინც მოხედა მათ გაჭირვებას, როცა ისმინა მათი ღაღადი.

⁴⁵გაიხსენა აღთქმა თავისი და ანუგეშა თავისი მრავალმოწყალებით.

⁴⁶აღვიძებდა მათდამი თანაგრძნობას ყველა მათ დამტყვევებელს შორის.

⁴⁷გვიხსენი, უფალო, ღმერთო ჩვენო, და გამოგვკრიბე წარმართთაგან, რათა მადლი შევწიროთ შენს წმიდა სახელს და განვდიდეთ შენი ქება-დიდებით!

⁴⁸კურთხეულ არის უფალი, ღმერთი ისრაელისა, ამიერიდან და უკუნისამდე! და თქვას მთელმა ხალხმა: ამინ! ადიდეთ უფალი!