Read ქართული ბიბლია, სრული ვერსია Psalms 113 Bible Online

Psalms 113 - ქართული ბიბლია, სრული ვერსია bible

Psalms 113

¹როდესაც გამოვიდა ისრაელი ეგვიპტიდან, სახლი იაკობისა — უცხოენოვანი ერისაგან,

²გახდა იუდა მისი სიწმიდე, ისრაელი — მისი სამფლობელო.

³ზღვამ დაინახა და ილტვოდა, იორდანე უკან გაბრუნდა;

⁴მთები აცეკვდნენ ერკემლებივით, ბორცვნი ხტოდნენ კრავებივით.

⁵რა დაგემართა, ზღვაო, რომ ილტვი, და, იორდანევ, უკან რომ გაბრუნდი?

⁶მთებო, რას ცეკვავთ ერკემლებივით, ბორცვებო, რატომ ხტით კრავებივით?

⁷უფლის წინაშე ძრწოდე, დედამიწავ, იაკობის ღმერთის წინაშე,

⁸რომელმაც აქცია კლდე წყალსატევად, კაჟი — წყაროს წყლად!

⁹ჩვენ არა, უფალო, ჩვენ არა, შენს სახელს მიაგე დიდება შენი წყალობითა და შენი ჭეშმარიტებით.

¹⁰რატომ უნდა თქვან ერებმა: სად არის მათი ღმერთი?

¹¹ჩვენი ღმერთი ზეცაშია; ყოველივე, რაც სურდა, მოიმოქმედა.

¹²მათი კერპები ვერცხლი და ოქროა, ადამიანთა ხელით შექმნილი.

¹³პირი აქვთ და ვერ ლაპარაკობენ, თვალები აქვთ და ვერ ხედავენ,

¹⁴ყურები აქვთ და არ ესმით, ცხვირი აქვთ და ვერ იყნოსავენ,

¹⁵ხელები აქვთ და ვერაფერს ეხებიან, ფეხები აქვთ და ვერ დადიან, ხმას ვერ გამოსცემენ თავიანთი ხორხიდან.

¹⁶მათ დაემსგავსებიან მათი გამკეთებელნი, ყველა, ვინც მათზეა მინდობილი.

¹⁷ისრაელო, მიენდე უფალს! — ის არის მათი შემწე და ფარი.

¹⁸აარონის სახლო, მიენდე უფალს! — ის არის მათი შემწე და ფარი.

¹⁹მოშიშნო უფლისა, მიენდეთ უფალს! — ის არის მათი შემწე და ფარი.

²⁰უფალს ვახსოვართ — გვაკურთხებს! აკურთხებს ისრაელის სახლს, აკურთხებს აარონის სახლს!

²¹აკურთხებს უფლის მოშიშებს, დიდსა და მცირეს.

²²დაე, გამრავლოთ უფალმა თქვენ და თქვენი შვილები.

²³კურთხეული ხართ უფლის მიერ, ცისა და ქვეყნის შემოქმედის მიერ.

²⁴ცანი — ცანია უფლისა, ხოლო ქვეყანა მისცა კაცთა შვილებს.

²⁵მკვდრები კი არ აქებენ უფალს, და არც მდუმარებაში ჩასულნი,

²⁶არამედ ჩვენ ვადიდებთ უფალს ამიერიდან უკუნისამდე. ადიდეთ უფალი!