Read ქართული ბიბლია, სრული ვერსია Psalms 134 Bible Online

Psalms 134 - ქართული ბიბლია, სრული ვერსია bible

Psalms 134

¹ალელუია! ადიდეთ სახელი უფლისა! ადიდეთ, მსახურნო უფლისა,

²რომელნიც დგახართ უფლის სახლში, ეზოებში ჩვენი ღმერთის სახლისა!

³ადიდეთ უფალი, რადგან კეთილია უფალი; უგალობეთ მის სახელს, რადგან მოწყალეა!

⁴რადგან იაკობი ამოირჩია თავისთვის უფალმა, ისრაელი — თავის წარჩინებულად.

⁵რადგან ვიცი, რომ დიდია უფალი; ჩვენი უფალი ყველა ღმერთზე დიდია.

⁶ყოველივეს, რაც სურს, იქმს უფალი, ცაში და ქვეყანაზე, ზღვებსა და უფსკრულებში.

⁷ამოჰყავს ღრუბლები ქვეყნის კიდიდან, ელვებს წვიმად აქცევს, გამოჰყავს ქარი თავისი საცავებიდან.

⁸მან მოსრა პირმშო ეგვიპტისა — ადამიანიდან პირუტყვამდე.

⁹მოავლინა ნიშნები და სასწაულები შენს შორის, ეგვიპტევ, ფარაონისა და მის მსახურეთა წინააღმდეგ.

¹⁰მან მოსრა მრავალი თესლ-ტომი და დახოცა ძლიერი მეფენი:

¹¹სიხონი — მეფე ამორეველთა, ყოგი — მეფე ბაშანისა, და ყველა მეფე ქანაანისა.

¹²და მისცა მათ ქვეყანა სამკვიდროდ, სამკვიდროდ ისრაელს — თავის ხალხს.

¹³უფალო, შენი სახელი მარადიულია, უფალო, შენი სახსენებელი თაობიდან თაობამდეა.

¹⁴რადგან განიკითხავს უფალი თავის ხალხს და თავის მორჩილთ შეივრდომებს.

¹⁵წარმართთა კერპები ვერცხლი და ოქროა, ადამიანის ნახელავი.

¹⁶პირი აქვთ და ვერ ლაპარაკობენ, თვალები აქვთ და ვერ ხედავენ;

¹⁷ყურები აქვთ და ვერ ისმენენ, სუნთქვაც არა აქვს მათ ბაგეებს.

¹⁸მათი მსგავსნი იქნებიან მათი შემქმნელნი და ყველა, ვინც მათზეა მინდობილი.

¹⁹ისრაელის სახლო, აკურთხე უფალი! აარონის სახლო, აკურთხე უფალი!

²⁰ლევის სახლო, აკურთხე უფალი! უფლის მოშიშნო, აკურთხეთ უფალი!

²¹კურთხეულია უფალი სიონიდან, დამკვიდრებული იერუსალიმში. ადიდეთ უფალი!