Read ქართული ბიბლია, სრული ვერსია Psalms 142 Bible Online

Psalms 142 - ქართული ბიბლია, სრული ვერსია bible

Psalms 142

¹ფსალმუნი დავითისა. უფალო, ისმინე ლოცვა ჩემი, ყურად იღე ჩემი ვედრება! მიპასუხე შენი ჭეშმარიტებით, შენი სიმართლით!

²ნუ შეხვალ სამართალში შენს მსახურთან, რადგან ვერ გამართლდება შენს წინაშე ვერავინ.

³რადგან დევნა მტერმა ჩემი სული, მიწაზე დაანარცხა ჩემი სიცოცხლე, დამსვა ბნელეთში დიდი ხნის მკვდრების მსგავსად.

⁴ამიტომ შეწუხდა ჩემში სული ჩემი, გული ჩემი დანაღვლიანდა ჩემში.

⁵ვიხსენებ ძველ დღეებს, ვფიქრობ ყოველ შენს ნამოქმედარზე, ვუკვირდები შენი ხელის საქმეებს.

⁶ვიწვდი ხელებს შენსკენ; ჩემს სულს, ვითარცა მიწას გამოფიტულს, მოსწყურდი შენ.

⁷მსწრაფლ მიპასუხე, უფალო, სული ჩემი გაილია! ნუ დაფარავ შენს სახეს ჩემგან, თორემ დავემსგავსები საფლავში ჩასულებს.

⁸მომასმენინე დილდილობით შენი წყალობა, რადგანაც შენი იმედი მაქვს. მაუწყე, რომელი გზით ვიარო, რადგან შენსკენ აღვაპყრობ ჩემს სულს.

⁹მიხსენ ჩემს მტერთაგან, უფალო; შენთან ვაფარებ თავს!

¹⁰მასწავლე შესრულება შენი ნებისა, რადგან შენა ხარ ჩემი ღმერთი! შენი კეთილი სული წამიძღვეს სიმართლის გზაზე!

¹¹შენი სახელის გულისათვის მაცოცხლე, უფალო! შენი სიმართლით გამოიყვანე გასაჭირიდან ჩემი სული!

¹²შენი წყალობით მოსპე ჩემი მტრები, დაღუპე ყოველი მჩაგვრელი ჩემი სულისა, რადგან მე შენი მორჩილი ვარ.