Read ქართული ბიბლია, სრული ვერსია Psalms 18 Bible Online

Psalms 18 - ქართული ბიბლია, სრული ვერსია bible

Psalms 18

¹გუნდის ლოტბარს. ფსალმუნი. დავითისა.

²ცანი ღაღადებენ ღმერთის დიდებას, მის ხელთა საქმეებს გვამცნობს სამყარო.

³დღე დღეს გადასცემს სიტყვას, და ღამე ღამეს უმხელს აზრს,

⁴არ არის ენა და არცა სიტყვა, სადაც არ ისმის მათი ხმა.

⁵მთელი დედამიწის ზურგზე გადის მათი ხმა და სამყაროს კიდეებამდე აღწევს მათი სიტყვები; მზეს დაუდგა კარავი მათში.

⁶ვითარცა ნეფე, გამოდის ის საქორწინო ტავხტრევანიდან; ვითარცა გმირი, ხარობს ის გარბენას გზისას.

⁷ცათა კიდიდან არის მისი აღმოსავალი და მისი ბრუნვა — ცათა კიდემდე, ვერაფერი ემალება მის მხურვალებას.

⁸რჯული უფლისა სრულყოფილია, სულს განამტკიცებს; მცნება უფლისა ჭეშმარიტია, სიბრძნეს ანიჭებს გულუბრყვილოებს.

⁹მართებულია უფლის ბრძანებანი, გულს ახარებენ; მცნება უფლისა სპეტაკია, შუქს აძლევს თვალებს.

¹⁰შიში უფლისა წმიდაა, მარადიული. უფლის განსჯანი ჭეშმარიტნი, მართალნი ერთობ.

¹¹სასურველნი არიან ოქროზე და თვით ბაჯაღლოზე მეტად და უტკბილესნი თაფლისა და გოლეულისა.

¹²შენი მორჩილი მათით არის განათლებული; დიდია საზღაური მათი დაცვისთვის.

¹³ვინ გულისხმა-ჰყოს შეცდომანი თვისნი? განმწმიდე მე დაფარულთაგან.

¹⁴უნებლიე ცოდვებს განაშორე მსახური შენი, რათა არ გაბატონდნენ ჩემზე! მაშინ უმწიკვლო ვიქნები და თავს დავაღწევ დიდ ცოდვას.

¹⁵დაე, იყოს შენთვის სასურველი ჩემი პირის სიტყვანი და ჩემი გულის ზრახვანი, უფალო, ბურჯო და მხსნელო ჩემო.