Read ქართული ბიბლია, სრული ვერსია Psalms 2 Bible Online

Psalms 2 - ქართული ბიბლია, სრული ვერსია bible

Psalms 2

¹დავითის ფსალმუნი რატომ ბობოქრობენ ერები და ერები იზრახავენ ამაოებას?

²დასხდნენ ამა ქვეყნის მეფენი და წარჩინებულნი და შეითქვნენ უფლისა და მისი ცხებულის წინააღმდეგ:

³„დავგლეჯთ მათ სადავეებს და მოვიშორებთ მათ ხუნდებს.“

⁴მკვიდრი ზეცისა გაიცინებს, უფალი აბუჩად აიგდებს მათ.

⁵მაშინ ეტყვის რისხვით და მრისხანებით შეაძრწუნებს:

⁶„მე თვით ვაკურთხე ჩემი მეფე სიონზე — ჩემს წმიდა მთაზე.“

⁷გაუწყებთ უფლის განწესებას: უფალმა მითხრა: „შენ ძე ხარ ჩემი, დღეს გშობე შენ;

⁸მთხოვე და მოგცემ ხალხებს სამკვიდროდ, ქვეყნის კიდეებს — სამფლობელოდ,

⁹დალეწავ მათ რკინის კვერთხით, მეთუნის ჭურჭელივით დაამსხვრევ მათ.“

¹⁰ახლა კი გონს მოდით, მეფენო! გაფრთხილდით, ქვეყნის მმართველნო!

¹¹ემსახურეთ უფალს შიშით, შეჰღაღადეთ ძრწოლით!

¹²თაყვანი ეცით ძეს, რომ არ განრისხდეს და არ დაიღუპოთ გზაში, რადგან მალე აღეგზნება მისი რისხვა. ნეტარია ყველა, მასზე მინდობილი.