Read ქართული ბიბლია, სრული ვერსია Psalms 21 Bible Online

Psalms 21 - ქართული ბიბლია, სრული ვერსია bible

Psalms 21

¹გუნდის ლოტბარს. ცისკრის აღმობრწყინებისას. ფსალმუნი დავითისა.

²ღმერთო ჩემო! ღმერთო ჩემო! რად მიმატოვე? შემოგღაღადებ, მაგრამ შორს არის ჩემგან შველა.

³ღმერთო ჩემო! მოგიხმობ დღისით და არ მპასუხობ, ღამით — და არ არის სიმშვიდე ჩემთვის.

⁴შენ კი, წმიდა ხარ და მკვიდრობ ისრაელის ხოტბათა შორის.

⁵შენ გესავდნენ ჩვენი მამები, გესავდნენ და იხსენი კიდეც.

⁶შენ გევედრებოდნენ და გადარჩნენ; შენი იმედი ჰქონდათ და არ გაწბილდნენ.

⁷მე კი მატლი ვარ და არა კაცი, საძრახისი ადამიანთა და საძულველი ერისა.

⁸ყველა, ვინც მხედავს, დამცინის; მქირდავენ და თავს აქნევენ:

⁹„უფალს მიენდო, მაშ მანვე იხსნას, მან უშველოს თავის სასურველს!“

¹⁰შენ გამომიყვანე დედის მუცლიდან, დამამშვიდე დედის მკერდზე.

¹¹შენი იმედი მქონდა დედის მუცლიდან; დედის წიაღიდან შენ ხარ ჩემი ღმერთი.

¹²ნუ განმშორდები, რადგან ახლოა უბედურება, ხოლო შემწე არავინ არის.

¹³გარს შემომერტყნენ ძლიერი ხარები, ბაშანის ხარებმა რკალი შემომარტყეს.

¹⁴პირს აღებენ ჩემს წინააღმდეგ, მსხვერპლს დადევნებული და მბრდღვინავი ლომივით.

¹⁵ვითარცა წყალი დავიღვარე და დაიშალნენ ჩემი ძვლები; ცვილს დაემსგავსა ჩემი გული, დადნა ჩემს გვამში.

¹⁶გამოიფიტა ჩემი ძალა, ვითარცა თიხა; ენა სასაზე მიმეკრა, ჩამიყვანე სიკვდილის მტვერში.

¹⁷გარს შემომეხვივნენ ძაღლები; ბოროტთა ხროვა წრედ შემომერტყა, გამიხვრიტეს ხელნი და ფერხნი.

¹⁸მთელი ჩემი ძვლები დაითვლება; მომჩერებიან ნიშნის მოგებით.

¹⁹ჩემს სამოსელს ინაწილებენ და წილს იყრიან ჩემს კვართზე.

²⁰მაგრამ შენ, უფალო, ნუ განმშორდები! სიმძლავრევ ჩემო, ჩემდა შემწედ გამოეშურე!

²¹გადაარჩინე ჩემი სული მახვილისაგან და ძაღლთაგან ჩემი სიცოცხლე!

²²მიხსენი ლომის ხახისაგან და გარეული ხარების რქისგან!

²³ჩემს ძმებს მოვუთხრობ შენს სახელზე, კრებულთა შორის გადიდებ შენ.

²⁴უფლის მოშიშნო, ადიდეთ იგი! პატივი მიაგოს მას იაკობის ჩამომავლობამ და გეშინოდეს მისი, ისრაელის მთელო მოდგმავ!

²⁵რადგან არ დაამცირა და არ უგულებელყო ტანჯვა გლახაკისა, არ მოარიდა პირი თვისი, უსმინა მას, როს მოუხმობდა.

²⁶მინდა შეგასხა ხოტბა მრავალთა კრებულში, მის მოშიშთა წინაშე გადავიხდი აღთქმულს.

²⁷შეჭამენ ღატაკნი და გაძღებიან, ადიდებენ უფალს მისი მაძიებლები; სამარადჟამოდ იცოცხლონ თქვენმა გულებმა!

²⁸გაიხსენებენ და უფალთან დაბრუნდებიან ქვეყნიერების ყველა კიდენი, და თაყვანს სცემს მას ყველა ტომი წარმართებისა.

²⁹რამეთუ უფალს ეკუთვნის მეფობა და ის არის ხალხთა მბრძანებელი.

³⁰თაყვანს სცემს ამ ქვეყნის ყველა ამაყი, მის წინაშე ქედს მოიხრის ყველა, ვინც მტვრად უნდა იქცეს, ვისაც არ ძალუძს თვისი სულის ხსნა.

³¹შთამომავლობა ემსახურება მას; მოუთხრობს მომავალ თაობებს უფლის შესახებ.

³²აუწყებენ მის სიმართლეს ხალხს, ჯერ არ შობილს, იმას, რაც მოიმოქმედა უფალმა.