Read ქართული ბიბლია, სრული ვერსია Psalms 24 Bible Online

Psalms 24 - ქართული ბიბლია, სრული ვერსია bible

Psalms 24

¹ფსალმუნი დავითისა. შენსკენ აღვაპყრობ, უფალო, ჩემს სულს.

²ღმერთო ჩემო! შენ გესავ, ნუ შევრცხვები, ნუ აზეიმებ მტერს ჩემზე.

³ნუ შერცხვება ნურავინ, ვინც შენ გსასოებს. შერცხვნენ ფუჭად შემცოდველნი.

⁴შენი გზები მაუწყე, უფალო, მასწავლე შენი კვალი.

⁵წარმიძეღ შენი ჭეშმარიტებით და მასწავლე, რადგან შენ ხარ ღმერთი ჩემი ხსნისა; შენი იმედი მაქვს მთელი დღე.

⁶გაიხსენე, უფალო, წყალობა შენი და გულმოწყალება შენი, რადგან ისინი საუკუნოა.

⁷ცოდვანი ჩემი სიჭაბუკისა და ბრალი ჩემი არ გაიხსენო; გამიხსენე შენი გულმოწყალებით, შენი სიკეთით, უფალო!

⁸კეთილი არის უფალი და მართალი, ამიტომ კვლავ აბრუნებს ცოდვილთ გზაზე.

⁹შეუძღვება თავმდაბალთ სამართალში და გზას ასწავლის მორჩილთ.

¹⁰ყველა გზა უფლისა წყალობაა და ჭეშმარიტება მის აღთქმათა და მცნებათა შემნახველთათვის.

¹¹შენი სახელისათვის, უფალო, შემინდე ჩემი შეცოდება, რადგან დიდია იგი.

¹²ვინ არის კაცი, მოშიში უფლისა? მას უჩვენებს გზას, რომელიც უნდა აირჩიოს.

¹³მისი სული კეთილად განისვენებს და მისი მოდგმა დაიმკვიდრებს ქვეყანას.

¹⁴საიდუმლო უფლისა — მოშიშთა მისთა, და თავის აღთქმას აუწყებს მათ.

¹⁵ჩემი თვალები მუდამ უფლისკენ არის მიმართული, მახისაგან იხსნის იგი ჩემს ფეხებს.

¹⁶გადმომხედე და შემიწყალე მე, ვინაიდან მარტოსული ვარ და ბედუკუღმართი.

¹⁷განივრცო ტანჯვა ჩემი გულისა, მიხსენ ჩემი გასაჭირისგან.

¹⁸შეხედე ჩემს ტანჯვას და დაქანცულობას და შემინდე ყველა ჩემი შეცოდება.

¹⁹მოხედე, როგორ გამრავლდნენ ჩემი მტრები და საშინელი სიძულვილით შემიძულეს მე.

²⁰დაიფარე ჩემი სული და დამიხსენი; ნუ შევრცხვები, რადგან შენ გესავ.

²¹უბიწოებამ და სიმართლემ დამიფაროს მე, რადგან შენა ხარ ჩემი იმედი.

²²იხსენ, უფალო, ისრაელი ყოველი მისი გასაჭირისგან.