Read ქართული ბიბლია, სრული ვერსია Psalms 30 Bible Online

Psalms 30 - ქართული ბიბლია, სრული ვერსია bible

Psalms 30

¹გუნდის ლოტბარს. ფსალმუნი. დავითისა.

²შენში ვეძებ ხსნას, უფალო, ნურც შევრცხვენილვარ ნურასოდეს; შენი სიმართლით გამომიხსენი.

³მომაპყარ ყური შენი, სწრაფად გადამარჩინე, იყავ ჩემთვის კლდე და ბურჯი, ციხესიმაგრე ჩემს დასახსნელად.

⁴რადგანაც ჩემი კლდე და ბურჯი ხარ; შენი სახელის გულისათვის მიჩვენე გზა და გამიძეხი.

⁵გამომიყვანე მახისაგან, რომელიც ჩუმად დამიგეს, რადგან შენა ხარ სიმაგრე ჩემი.

⁶შენს ხელს შევავედრებ ჩემს სულს. შენ დამიხსნი, უფალო, ღმერთო ჭეშმარიტო.

⁷შენ შეიძულე ფუჭი კერპების თაყვანისმცემლები მე კი უფალს მივენდე.

⁸ვილხენ და ვიხარებ შენი წყალობით, რადგან შენ იხილე ჩემი სისაწყლე, შეიცან ტანჯვა ჩემი სულისა.

⁹და არ მიმეცი მტრის ხელს; ფართოდ დაამკვიდრე ფერხნი ჩემნი.

¹⁰შემიწყალე, უფალო, რადგან მიჭირს, დაიშრიტა წუხილით თვალი ჩემი, სული ჩემი და მუცელი ჩემი.

¹¹რადგან გაილია ნაღველში ჩემი სიცოცხლე და ჩემი წლები — გლოვაში. დაუძლურდა ჩემი ძალა ჩემი ცოდვებით და ჩემი ძვლები დაიფშხვნა.

¹²ყველა ჩემი მტრისაგან შერცხვენილი შევიქენ, მეზობელთათვის — ძრწოლა, და საშიში ნაცნობთათვის; ვინც კი ქუჩაში დამინახავს, გარბის ჩემგან.

¹³გულიდან ამომიგდეს, ვითარცა მკვდარი; დამსხვრეულ ჭურჭელს დავემსგავსე.

¹⁴რადგან მესმის ცილისწამება მრავალთა, შიშია ყოველი მხრიდან! ისინი შეითქვნენ ჩემს წინააღმდეგ, ჩემი სულის ამოხდა განიზრახეს,

¹⁵მე კი შენი იმედი მაქვს, უფალო, ვთქვი: შენა ხარ ჩემი ღმერთი.

¹⁶შენს ხელთ არის ჩემი დრო-ჟამი. მიხსენ ჩემს მტერთა და მდევნელთა ხელთაგან.

¹⁷უჩვენე შენი ბრწყინვალე სახე შენს მორჩილს, გადამარჩინე შენი წყალობით.

¹⁸უფალო, ნუ შემარცხვენ, რადგან შენ მოგიხმობ. დაე, შერცხვნენ ბოროტნი და დადუმდნენ ჯოჯოხეთში.

¹⁹დაე, დამუნჯდნენ ცრუ ბაგეები, რომელნიც ქედმაღლად ლაპარაკობენ მართალზე, ამპარტავნებით და სიძულვილით.

²⁰რაოდენ მრავალი სიკეთე გაქვს, უფალო, შენს მოშიშთათვის რომ ინახავ, შენს მსასოებელთ რომ განუმზადე ადამის ძეთა წინაშე.

²¹შენ იფარავ მათ შენი პირის საფარველქვეშ ადამიანის ხრიკებისაგან, იცავ მათ ენით გამომწვეული დავიდარაბისგან.

²²კურთხეულია უფალი, რადგან მომივლინა თავისი საკვირველი წყალობა გამაგრებულ ქალაქში.

²³და მე ვფიქრობდი ძრწოლით: მოწყვეტილი ვარ შენს თვალთაგან. მაგრამ შენ ისმინე ჩემი მუდარის ხმა, როცა მოგიხმე საშველად.

²⁴შეიყვარეთ უფალი, მისნო წმიდანო; ერთგულს იცავს უფალი და მრავალგზის მიუზღავს ამპარტავნებს.

²⁵გამხნევდით და გული გაიმაგრეთ, ყველამ, ვისაც უფლის მოლოდინი გაქვთ.