Read ქართული ბიბლია, სრული ვერსია Psalms 35 Bible Online

Psalms 35 - ქართული ბიბლია, სრული ვერსია bible

Psalms 35

¹გუნდის ლოტბარს. უფლის მორჩილის, დავითისა.

²ბიწიერება ელაპარაკება ცოდვილებს გულების სიღრმეში; არ არის შიში ღმრთისა მათ თვალთა წინაშე.

³რადგან ეპირფერებიან საკუთარ თავს, რათა მათი ურჯულოება არ გამოჩნდეს და არ შეიძულონ.

⁴მათ ბაგეთა სიტყვები სიავე და სიყალბეა, ბრძნული და კეთილი საქციელი არა სჩვევიათ.

⁵უსამართლობას იზრახავენ თავიანთ სარეცელზე, უკეთურ გზას ადგებიან, ბოროტს არ თაკილობენ.

⁶უფალო, ზეცამდეა შენი წყალობა, ჭეშმარიტება შენი — ღრუბლებამდე.

⁷სიმართლე შენი, ვითარცა მთები ღმერთისა, სამართალი შენი — ღრმა უფსკრულივით. ადამიანსა და პირუტყვს შენ იხსნი, უფალო.

⁸რაოდენ ძვირფასია შენი წყალობა, ღმერთო! ადამის ძენი შენს ფრთებქვეშ აფარებენ თავს.

⁹დაპურდებიან შენი სახლის სიუხვით და შენს სიტკბოთა ნაკადებიდან შეასმევ მათ.

¹⁰რადგან შენთან არის წყარო სიცოცხლისა, შენი შუქით ვხედავთ სინათლეს.

¹¹მოჰფინე წყალობა შენი შენს აღმსარებლებს, და შენი მხსნელი სიმართლე გულწრფელებს!

¹²ნუ მოაღწევს ჩემთან ფეხი ამპარტავნისა, ნურც ბოროტთა ხელი განმდევნის მე.

¹³იქ არიან განრთხმულნი უსამართლობის მოქმედნი, დაენარცხნენ და აღარ ძალუძთ წამოდგომა.