Read ქართული ბიბლია, სრული ვერსია Psalms 37 Bible Online

Psalms 37 - ქართული ბიბლია, სრული ვერსია bible

Psalms 37

¹ფსალმუნი დავითისა. გასახსენებელი.

²უფალო, შენი რიხსვით ნუ მამხილებ, და ნუ დამსჯი განრისხების ჟამს!

³რადგან შენი ისრები ჩემშია განწონილი და შენი ხელი მამძიმებს მე.

⁴აღარ არის ჯანსაღი ადგილი ჩემს სხეულში შენი რისხვის გამო; აღარ არის სისაღე ჩემს ძვლებში ჩემი ცოდვის გამო.

⁵რადგან ცოდვანი ჩემნი ასცილდნენ ჩემს თავს, მძიმე ტვირთად დამძიმდნენ ჩემზე.

⁶აყროლდნენ, დალპნენ ჩემი წყლულები ჩემი უგუნურების გამო.

⁷წელში მოვიხარე, დავმდაბლდი, მთელ დღეს ნაღვლიანი დავიარები.

⁸რადგან ჩემი წელი გათანგულია სიცხით და აღარ არის ჯანსაღი ადგილი ჩემს სხეულში.

⁹დავუძლურდი და დავძაბუნდი მეტისმეტად, ვღრიალებ ჩემი გულის სატკივარით.

¹⁰უფალო, შენს წინაშეა ყველა ჩემი სურვილი, ჩემი ოხვრა დაფარული არ არის შენგან.

¹¹ჩემი გული თრთის, ძალღონემ დამტოვა, ჩემს თვალთა სინათლე — აღარც ის არის ჩემთან.

¹²მოყვარულნი და მეგობარნი განერიდნენ ჩემს წყლულებს, და ახლობლები შორს განმიდგნენ.

¹³მახეს მიგებენ ჩემი სულის მაძიებლები, ჩემი სიავის მსურველები ბჭობენ ჩემს დასაღუპად და მთელ დღეს მზაკვრობას განიზრახავენ.

¹⁴მე კი არ მესმის, ვითარცა ყრუს და ვითარცა მუნჯს, პირს რომ ვერ აღებს.

¹⁵დავემსგავსე კაცს, რომელსაც არ ესმის და რომლის ბაგეებსაც არ შეუძლიათ პასუხის გაცემა.

¹⁶მაგრამ მე შენ გელოდები, უფალო, შენ მიპასუხებ, უფალო, ღმერთო ჩემო.

¹⁷გევედრები: ნუ გაახარებ მათ ჩემზე, თუ ფეხი გადამიბრუნდა, ნუ გააბატონებ ჩემზე!

¹⁸რადგან მარცხი მემუქრება და ჩემი სატკივარი მუდამ ჩემთანაა.

¹⁹ჩემს ბრალს ვაცხადებ, ვწუხვარ ჩემი ცოდვის გამო.

²⁰უსამართლოდ გადამტრებულები კი ძლიერდებიან, მრავლდებიან ჩემი ამაოდ მოძულენი.

²¹კეთილის წილ ბოროტის გადამხდელნი მმტრობენ იმისთვის, რომ კეთილს ვცდილობ.

²²ნუ მიმატოვებ, უფალო! ღმერთო ჩემო, ნუ განმშორდები!

²³გამოეშურე ჩემს შესაწევნად, უფალო, მხსნელო ჩემო!