Read ქართული ბიბლია, სრული ვერსია Psalms 38 Bible Online

Psalms 38 - ქართული ბიბლია, სრული ვერსია bible

Psalms 38

¹გუნდის ლოტბარს, იედუთუნს. დავითის ფსალმუნი.

²ვთქვი: „დავიცავ ჩემს გზებს, რომ არ შევცოდო ჩემი ენით; ალიკაპს ავიკრავ პირზე, ვიდრე ბოროტნი იმყოფებიან ჩემს სიახლოვეს.“

³მთლიანად დავმუნჯდი, დავდუმდი, მშვიდობას ვიცავდი, მაგრამ ვაება გამიძლიერდა.

⁴გახურდა გული ჩემს შიგნით, ჩემს აზრებში ცეცხლი აღეგზნო; მაშინ დავიწყე ლაპარაკი ჩემი ენით:

⁵„მაუწყე, უფალო, ჩემი აღსასრული, ჩემი დღეების ხანგრძლივობა, მაუწყე, რა არის ჩემი ბედისწერა!

⁶აჰა, გოჯებით მომეცი დღენი, ჩემი სიცოცხლის ხანი არაფერია შენს წინაშე; ჭეშმარიტად, ერთი ამოსუნთქვაა კაცის სიცოცხლე!

⁷ჭეშმარიტად, აჩრდილივით დაეხეტება ადამიანი, ამაოდ ფაციფუცობს, აგროვებს და არ იცის, ვის დარჩება!

⁸ახლა კი, რას ველი, უფალო? შენა ხარ ჩემი იმედი.

⁹მიხსენ ყოველი ჩემი ბრალისაგან, ნუ გამხდი ბრიყვის სალანძღავად!“

¹⁰დავდუმდი, ბაგეებს ვეღარ ვხსნი, რადგან ასე ჰქმენ შენ.

¹¹ამარიდე სასჯელი შენი; გავილიე შენი ხელის დარტყმებისაგან.

¹²თუ ცოდვის მხილებით დასჯი ადამიანს, ჩრჩილივით შეჭამ ყველა მის სურვილს; ჭეშმარიტად, მხოლოდ ამაოებაა ყოველი კაცი!

¹³ისმინე ჩემი ლოცვა, უფალო, და ჩემს ვედრებას ყური მოაპყარ; ნუ დადუმდები ჩემი ცრემლების მიმართ, რადგან მწირი ვარ შენი, ხიზანი, ვითარცა ჩემი მამა-პაპანი.

¹⁴მზერა მომაცილე, რათა მოვმაგრდე, ვიდრე წავალ და აღარ ვიქნები!