Read ქართული ბიბლია, სრული ვერსია Psalms 39 Bible Online

Psalms 39 - ქართული ბიბლია, სრული ვერსია bible

Psalms 39

¹გუნდის ლოტბარს. დავითის ფსალმუნი.

²მტკიცედ ვესავდი უფალს; ყური მომაპყრო და შეისმინა ჩემი ვედრება,

³ამომიყვანა საზარელი ორმოდან, გაუვალი ლაფიდან, დააყენა კლდეზე ფეხნი ჩემნი, განამტკიცა ნაბიჯნი ჩემნი,

⁴მისცა ჩემს ბაგეებს ახალი გალობა ჩვენი ღმერთის სადიდებლად. მრავალნი იხილავენ და შეშინდებიან, და მიენდობიან უფალს.

⁵ნეტარ არს კაცი, ვინც უფალზე ამყარებს იმედს, ვინც არ მისდევს კადნიერთ და გზას არ ასცდება ცრუ ღმერთების მოყვარულთა მსგავსად.

⁶შენ გაამრავლე, უფალო, ღმერთო ჩემო, შენი სასწაულები და შენი ჩანაფიქრები ჩვენთვის; ვინ შეგედრება შენ! ვიქადაგებ და ვილაპარაკებ მათზე; — მაგრამ ძნელია სათქმელად.

⁷მსხვერპლი და შესაწირავი არ ისურვე; მაგრამ ყური გამიმახვილე; სრულადდასაწველი და ცოდვის მსხვერპლი არ მოგითხოვია;

⁸მაშინ ვთქვი: „აჰა, მოვედი; წიგნის გრაგნილში წერია ჩემზე.

⁹შენი სურვილის შესრულება მწადია, ღმერთო, და რჯული შენი ჩემს გულშია.“

¹⁰შენს სიმართლეს მოვუთხრობდი დიდ კრებულს, აჰა, ბაგენი ჩემნი არ მომიკუმავს, უფალო, შენ უწყი.

¹¹შენი სიმართლე არ დამიფარავს ჩემს გულში; შენს ერთგულებასა და შენს ხსნაზე ვლაპარაკობდი; შენი წყალობა და ჭეშმარიტება არ დამიმალავს დიდი კრებულის წინაშე.

¹²უფალო, ნუ მომაკლებ შენს წყალობას; შენი მადლი და შენი ჭეშმარიტება მუდამ მიცავენ მე!

¹³რადგან გარს მერტყმის აურაცხელი უბედურება, წამომეწივნენ ცოდვანი ჩემნი, აღარ ძალმიძს მე გზის დანახვა; ჩემი თმის ბეწვებზე მეტად მომრავლდნენ და გული ჩამწყდა.

¹⁴ისურვე, უფალო, ჩემი ხსნა! უფალო, ჩემს დასახმარებლად გამოეშურე!

¹⁵დაე, შერცხვნენ და გაწბილდნენ ჩემი სიცოცხლის დაღუპვის მაძიებელნი, უკუიქცნენ და წახდნენ ჩემი ავის მდომნი;

¹⁶დაე, შეძრწუნდნენ სირცხვილისაგან, ვინც მეუბნებოდა: ოჰო, ოჰო!

¹⁷გაიხაროს და გამხიარულდეს ყველა, ვინც შენ გეძიებს; შენი ხსნის მოყვარულებმა თქვან მუდამ: დიდია უფალი!

¹⁸ხოლო მე კი ღარიბ-ღატაკი ვარ; მაგრამ უფალი ფიქრობს ჩემზე. შენა ხარ ჩემი დამხმარე და მხსნელი, ღმერთო ჩემო, ნუ დააყოვნებ!