Read ქართული ბიბლია, სრული ვერსია Psalms 40 Bible Online

Psalms 40 - ქართული ბიბლია, სრული ვერსია bible

Psalms 40

¹გუნდის ლოტბარს. დავითის ფსალმუნი.

²კურთხეულია, ვინც ფიქრობს ღატაკზე; უბედურების დღეს იხსნის მას უფალი.

³უფალი დაიცავს და აცოცხლებს მას; ბედნიერი იქნება ქვეყანაზე; შენ არ გადასცემ მას მტრების სურვილისამებრ.

⁴უფალი გაამაგრებს მას მისი სნეულების სარეცელზე; მთელ მის სარეცელს შეცვლი შენ ავადმყოფობის ჟამს.

⁵მე კი ვთქვი: უფალო, შემიწყალე, განმკურნე, რადგან შეგცოდე.

⁶ჩემი მტრები ავს ამბობენ ჩემზე: როდის მოკვდება და გაქრება მისი სახელი?

⁷ვინმე თუ მოვა ჩემს სანახავად, ცარიელ სიტყვებს ამბობს; მისი გული კი სიცრუეს თხზავს; გარეთ გავა და ალაპარაკდება.

⁸ერთთავად ჩემზე ჩურჩულებენ ჩემი მოძულენი; ყველაზე უარესს ისურვებენ ჩემთვის.

⁹ამბობენ: სასიკვდილო სენი დაეუფლა მას; ვინც ერთხელ დაწვა, ვეღარ წამოდგება!

¹⁰ჩემმა განუყრელმა მეგობარმაც კი, ვისი იმედიც მქონდა, ვინც ჩემს პურს ჭამდა, ქუსლი აღმართა ჩემზე.

¹¹ხოლო შენ, უფალო, შემიწყალე, წამომაყენე, და მე მივუზღავ მათ.

¹²იმით გავიგე, რომ გიყვარვარ, რომ მტერმა არ გაიხარა ჩემზე.

¹³ჩემი უბიწოებისათვის შემეწიე და შენს წინაშე დამაყენე სამარადისოდ.

¹⁴კურთხეულ არს უფალი, ღმერთი ისრაელისა, უკუნითი უკუნისამდე! ამინ, ამინ.