Read ქართული ბიბლია, სრული ვერსია Psalms 41 Bible Online

Psalms 41 - ქართული ბიბლია, სრული ვერსია bible

Psalms 41

¹გუნდის ლოტბარს. მოძღვრება კორახის ძეთა.

²როგორც ირემი მიილტვის წყლის ნაკადებისკენ, ისე მოილტვის ჩემი სული შენსკენ, ო ღმერთო!

³ცოცხალი ღმერთის წყურვილი აქვს ჩემს სულს: როდის მოვალ და ვიხილავ სახეს ღმერთისას?

⁴ჩემი ცრემლები პურად მქონდა დღისით და ღამით, როს მეუბნებოდნენ გამუდმებით: სად არის ღმერთი შენი?

⁵როდესაც სული მეღვრება, მახსენდება, როგორ ვიდოდი ხალხის გუნდში, როგორ მივუძღვოდი უფლის სახლამდე მოზეიმე გუნდს მხიარულებისა და მადლიერების ხმით.

⁶რას დაღვრემილხარ, სულო ჩემო, და რად დამკვნესი? მიენდე ღმერთს, რადგან კვლავაც ვადიდებ მას, ჩემს მხსნელსა და ჩემს ღმერთს.

⁷დაღვრემილია სული ჩემი; ამიტომ გიხსენებ იორდანეს მიწიდან და ხერმონის მწვერვალებიდან, მიცყარის მთიდან.

⁸უფსკრული უფსკრულს გასძახის შენი ჩანჩქერების ხმით; ყველა ტალღამ და ზვირთმა შენმა ჩემზე გადაიარა.

⁹დღისით გამოგზავნის უფალი თავის წყალობას, და ღამით ვუგალობებ მას, ეს არის ჩემი ლოცვა ჩემი ცოცხალი ღმერთის მიმართ.

¹⁰ვუთხარი ღმერთს, ჩემს სიმტკიცეს: რად დამივიწყე? რატომ უნდა ვიარო მგლოვიარე გულით, მტრისგან გათელილმა?

¹¹ჩემი ძვლების შემუსვრის დროს მლანძღავენ ჩემი მტრები, მეუბნებიან ყოველდღე: სად არის ღმერთი შენი?

¹²რას დაღვრემილხარ, სულო ჩემო, და რად დამკვნესი? მიენდე ღმერთს; რადგან კვლავაც ვადიდებ მას, — ჩემს მხსნელსა და ჩემს ღმერთს.