Read ქართული ბიბლია, სრული ვერსია Psalms 43 Bible Online

Psalms 43 - ქართული ბიბლია, სრული ვერსია bible

Psalms 43

¹გუნდის ლოტბარს. კორახის ძეთა მოძღვრება.

²ღმერთო, ჩვენი ყურით მოვისმინეთ, ჩვენი მამები გვიამბობდნენ, რა საქმენი მოიმოქმედე მათ დღეებში, უძველეს დროში.

³შენი ხელით განდევნე წარმართნი, ხოლო ისინი დანერგე; გაანადგურე ერები და განდევნე, ისინი კი გააფართოვე.

⁴ვინაიდან მათ ხმლით კი არ მოუპოვებიათ ქვეყანა, და არც მათ მკლავებს მოუტანია მათთვის გამარჯვება, არამედ შენმა მარჯვენამ, შენმა მკლავმა და შენი სახის ნათელმა, რადგან მათდამი კეთილგანეწყვე.

⁵შენა ხარ ჩემი ხელმწიფე და ჩემი ღმერთი, შენ უბოძებ შველას იაკობს.

⁶შენით ვანარცხებთ ჩვენს მტრებს; შენი სახელით ვთრგუნავთ ჩვენს მოდავეებს.

⁷რადგან ჩემს მშვილდზე არა ვარ დანდობილი და ვერც ჩემი მახვილი მიხსნის,

⁸არამედ შენ გვიხსენი ჩვენი მტრებისაგან და ჩვენი მოძულეები შეარცხვინე.

⁹ღმერთით ვიქადოდით დღეყოველ და შენს სახელს ვადიდებთ უკუნისამდე.

¹⁰მაგრამ მიგვატოვე და დაგვამცირე, და არ გამოხვედი ჩვენს მხედრობასთან.

¹¹უკუგვაქციე მტრისაგან, და მოძულეებმა გაგვძარცვეს ჩვენ.

¹²მიგვეცი, როგოც ცხვარი, შესაჭმელად, გაგვფანტე ერებს შორის.

¹³გაყიდე შენი ერი სარგებლის გარეშე, არ იდავე მათ ფასზე.

¹⁴მიგვეცი შესარცხვენად მეზობლებს, დასაცინად და საგინებლად — ირგვლივ მყოფთ.

¹⁵იგავად გვაქციე ერებს შორის, თავის საქნევად ხალხებს შორის.

¹⁶დღეყოველ ჩემი აუგი ჩემს წინაშეა, და სირცხვილი მიფარავს სახეს

¹⁷დამცინავისა და მაგინებელის ხმისაგან, მტრისა და შურისმაძიებლისაგან.

¹⁸ყოველივე ეს გვეწია ჩვენ, თუმცა არ დაგვივიწყებიხარ, და არ გაგვიმრუდებია შენი აღთქმა.

¹⁹არ უკუქცეულან ჩვენი გულები, და არც ჩვენს ტერფებს გადაუხვევიათ შენი ბილიკიდან.

²⁰და მაინც შეგვმუსრე ტურების ადგილას და გადაგვაფარე წყვდიადის ჩრდილი.

²¹ჩვენ რომ დაგვევიწყებინა სახელი ჩვენი ღმერთისა, და ხელი გაგვეშვირა უცხო კერპებისაკენ,

²²განა ღმერთი არ გვაზღვევინებდა ამას? რადგან მან იცის საიდუმლონი გულისა.

²³შენი გულისთვის გვხოცავენ ყოველდღე; დასაკლავ ცხვრებად მიგვიჩნიეს.

²⁴გამოიღვიძე, რატომ გძინავს, უფალო? გამოფხიზლდი, სამუდამოდ ნუ მიგვატოვებ!

²⁵რატომ იფარავ სახეს და ივიწყებ ჩვენს მწუხარებას და გასაჭირს?

²⁶რადგან ჩვენი სული მტვრამდეა დამდაბლებული, მიწას განერთხა ჩვენი სხეული.

²⁷აღსდექ! გამოეშურე ჩვენს საშველად! გვიხსენი შენი წყალობისათვის!