Read ქართული ბიბლია, სრული ვერსია Psalms 44 Bible Online

Psalms 44 - ქართული ბიბლია, სრული ვერსია bible

Psalms 44

¹გუნდის ლოტბარს. შოშანისებურად. კორახის ძეთა. მოძღვრება; გალობა სიყვარულისა.

²აღივსო ჩემი გული კეთილი სიტყვებით; ჩემი სიმღერა მეფეს ეკუთვნის; ჩემი ენა კალამია ხელოვანი მწერლისა.

³ადამის ძეთა შორის უმშვენიერესი ხარ, მადლი იღვრება შენს ბაგეთაგან, რადგან გაკურთხა ღმერთმა უკუნისამდე.

⁴შეიბ მახვილი წელზე, გმირო, შენი დიდებით და მშვენიერებით!

⁵შენი დიდებით დაბრძანდი ეტლზე ჭეშმარიტების, თვინიერებისა და სიმართლისათვის, გვაჩვენოს საოცრებანი მარჯვენამ შენმა!

⁶შენი ისრები წამახულია, გულში ერჭობიან მეფის მტრებს, ხალხები ეცემიან შენს ფეხქვეშ.

⁷ტახტი შენი, ღმერთო, უკუნითი უკუნისამდეა. სამართლის კვერთხია კვერთხი შენი მეუფებისა.

⁸შენ შეიყვარე სიმართლე და შეიძულე ბოროტება; ამიტომ გცხო ღმერთმა, შენმა ღმერთმა, სიხარულის ზეთი შენს მეგობრებზე მეტად.

⁹მთელი შენი სამოსი — ვითარცა მური, ალოე და კასია; სპილოს ძვლის დარბაზებიდან ქნართა ხმა გაგამხიარულებს შენ.

¹⁰მეფეთა ასულნი შენს დიდებულებს შორის არიან; შენს მარჯვნივ დადგა დედოფალი ოფირის ოქროთი შემკული.

¹¹მისმინე, ასულო, მოიხედე და მომაპყარ ყური. დაივიწყე ხალხი შენი და სახლი მამაშენისა.

¹²დატკბება მეფე შენი მშვენებით. რადგან ის არის შენი უფალი, თაყვანი ეცი მას.

¹³ასული ცორისა ძღვენით მოვა შენთან; ხალხთა მდიდარნი ყოველგვარი განძით;

¹⁴დიდებულია მეფის ასული მთლიანად შიგნით; ოქრონართისაა მისი სამოსი.

¹⁵მოქარგული კაბით მოჰყავთ იგი მეფესთან; უკან მოჰყვებიან ქალწულნი, დობილნი მისნი.

¹⁶სიხარულით და ლხენით შედიან მეფის სასახლეში.

¹⁷შენს წინაპართა ადგილას იქნებიან შენი ძენი; მათ დააყენებ მთავრებად მთელ ქვეყანაზე.

¹⁸დავაფუძნებ შენს სახელს თაობიდან თაობაში, ამიტომ ხალხები ხოტბას შეგასხამენ უკუნითი უკუნისამდე.