Read ქართული ბიბლია, სრული ვერსია Psalms 47 Bible Online

Psalms 47 - ქართული ბიბლია, სრული ვერსია bible

Psalms 47

¹გალობა; ფსალმუნი კორახის ძეთა.

²დიდია უფალი, და დიდად საქებარი ღმერთის ქალაქში!

³მისი წმიდა მთა მშვენივრადაა აღმართული, სიხარულია მთელი ქვეყნიერებისა; მთა სიონისა, ჩრდილოეთ მხარეს, ქალაქია დიდი მეფისა.

⁴ღმერთი თავის სიმაგრეებში გამოგვეცხადა, ვითარცა საიმედო მცველი.

⁵რადგან აგერ, შეიკრიბნენ მეფენი და მოვიდნენ ერთად.

⁶მაგრამ რომ ნახეს, განცვიფრდნენ, შეძრწუნდნენ და გაიქცნენ.

⁷ძრწოლამ შეიპყრო, იკლაკნებიან მშობიარესავით.

⁸აღმოსავლეთის ქარით შემუსრე შენ თარშიშის ხომალდები.

⁹როგორც ვისმინეთ, ისე ვიხილეთ ძალთა უფლის ქალაქში, ჩვენი ღმერთის ქალაქში. ღმერთმა დააფუძნა ის უკუნისამდე.

¹⁰ვფიქრობდით, ღმერთო, შენს წყალობაზე შენი ტაძრის შუაგულში.

¹¹ვითარცა სახელი შენი, ღმერთო, შენი დიდებაც დედამიწის კიდით-კიდემდეა; სავსეა გამარჯვებით შენი მარჯვენა.

¹²დაე იხაროს სიონის მთამ! იმხიარულონ იუდას ქალწულებმა შენი სიმართლის გამო!

¹³მიეახლეთ ყოველი მხრიდან და გარს შემოუარეთ სიონს; დათვალეთ მისი კოშკები.

¹⁴გული მიაპყარით მის სიმაგრეებს; დაიარეთ მისი დარბაზები, რათა უამბოთ მომავალ თაობას,

¹⁵რომ ის არის ღმერთი, ჩვენი ღმერთი სამარადჟამოდ. ის იქნება ჩვენი წინამძღოლი უკუნითი უკუნისამდე.