Read ქართული ბიბლია, სრული ვერსია Psalms 48 Bible Online

Psalms 48 - ქართული ბიბლია, სრული ვერსია bible

Psalms 48

¹გუნდის ლოტბარს. კორახის ძეთა. ფსალმუნი.

²ისმინეთ ეს, ყოველნო ერნო, ყური მოაპყართ, ქვეყნიერების ყველა მცხოვრებნო:

³უბრალოებმაც, დიდგვაროვნებმაც, მდიდარმა და ღარიბმა ერთად!

⁴ჩემი პირი წარმოთქვამს სიბრძნეს, ჩემი გულის განსჯა — გონიერებას.

⁵ყურს მივუგდებ იგავს, ქნარზე ამოვხსნი ჩემს გამოცანას.

⁶რად უნდა შემეშინდეს უბედურების ჟამს, როცა ჩემი მოდავეების ბოროტება გარს შემომეხვევა,

⁷რომელთაც თავიანთი ძალის იმედი აქვთ და უხვი სიმდიდრით იკვეხნიან?

⁸ძმა დახსნით ვერ დაიხსნის კაცს, ვერ მისცემს ღმერთს მის გამოსასყიდს.

⁹რადგან ძვირია მისი სულის გამოსახსნელი, ვერ გადაიხდის იმდენს უკუნისამდე,

¹⁰რომ ცოცხალი დარჩეს სამარადისოდ და აცდეს საფლავი.

¹¹აჰა, დაინახავს, რომ ბრძენნიც იხოცებიან, ისევე, როგორც ბრიყვნი და სულელნი, და თავიანთ დოვლათს სხვას უტოვებენ.

¹²საფლავებია მათი სამუდამო სახლი, მათი საცხოვრებელი თაობათა მანძილზე; თუმცა საკუთარ სახელებს უწოდებდნენ თავიანთ მამულებს.

¹³ვერ შეინარჩუნებს ადამიანი პატივს; დასაკლავი პირუტყვის მსგავსია იგი.

¹⁴ასეთია გზა უგუნურთა და თვითკმაყოფილთა დასასრული.

¹⁵ცხვრებივით ჯოჯოხეთის კერძნი არიან; სიკვდილი იქნება მათი მწყემსი, პირდაპირ საფლავში ჩაეშვებიან, მათი კვალიც კი აღარ დარჩება, ჯოჯოხეთი იქნება მათი სადგომი.

¹⁶ხოლო ჩემს სულს ღმერთი დაიხსნის ჯოჯოხეთიდან, რადგან მიმიღებს მე.

¹⁷ნუ შეგეშინდება, თუ კაცი გამდიდრდა, თუ გამრავლდა მისი სახლის დიდება.

¹⁸რადგან, როცა მოკვდება, თან ვერაფერს წაიღებს, თან არ ჩაჰყვება მისი დიდება.

¹⁹თუმცა სიცოცხლეში თავს ბედნიერად თვლის, — რადგან აქებენ იმას, ვინც კეთილს უკეთებს საკუთარ თავს.

²⁰ის მივა თავისი მამების მოდგმასთან, რომელნიც ვერასოდეს ვერ იხილავენ სინათლეს.

²¹ვერ შეინარჩუნებს ადამიანი პატივს; დასაკლავი პირუტყვის მსგავსია იგი.