Read ქართული ბიბლია, სრული ვერსია Psalms 49 Bible Online

Psalms 49 - ქართული ბიბლია, სრული ვერსია bible

Psalms 49

¹ფსალმუნი ასაფისა. ღმერთმა ღმერთთა, უფალმა, დაილაპარაკა და მოუწოდებს ქვეყნიერებას მზის აღმოსავლიდან დასავალამდე.

²სიონიდან, მშვენიერების სრულქმნილებიდან, გამობრწყინდა უფალი.

³მოდის ჩვენი ღმერთი და არ არის მდუმარე; მის წინაშე შთანმთქმელი ცეცხლია, მის ირგვლივ — ძლიერი ქარიშხალი.

⁴მოუწოდებს ზეცას და დედამიწას თავისი ხალხის განსასჯელად:

⁵შემოიკრიბეთ ჩემი ერთგულნი, რომელთაც აღთქმა დადეს ჩემთან შესაწირავზე!

⁶ცანი ღაღადებენ მის სიმართლეს, რადგან თვით ღმერთია მსაჯული!

⁷ისმინე, ჩემო ხალხო, და გეტყვი; ისრაელო, მე ვმოწმობ შენს წინააღმდეგ: მე ვარ ღმერთი, შენი ღმერთი.

⁸მსხვერპლისათვის კი არ გსაყვედურობ; შენი შესაწირავები ყოველთვის ჩემს წინაშეა.

⁹არ შევიწირავ შენი სახლიდან ზვარაკს, არც ვაცებს შენი ფარეხებიდან.

¹⁰რადგან ჩემია ტყის ყველა ცხოველი, ათასობით მთის პირუტყვი.

¹¹ჩემთვის ცნობილია მთის ყველა ფრინველი და მინდვრის ცხოველები ჩემს წინაშე არიან.

¹²თუ მომშივდა, არ გეტყვი შენ, რადგან ჩემია სამყარო და სავსება მისი.

¹³განა ხარების ხორცსა ვჭამ და ვაცების სისხლსა ვსვამ?

¹⁴შესწირე ღმერთს მადლობის მსხვერპლი და აღუსრულე უზენაესს აღთქმანი შენნი.

¹⁵მომიხმე გაჭირვების დღეს, გადაგარჩენ და შენ განმადიდებ.

¹⁶ბოროტს კი უთხრა ღმერთმა: რა უფლებით ქადაგებ ჩემს წესებს და პირთან მიგაქვს ჩემი პირობა?

¹⁷მაშინ როდესაც გძულს დარიგება და უკუისვრი ჩემს სიტყვებს?

¹⁸ქურდს რომ დაინახავ, მასთან გარბიხარ, და გარყვნილებთან დაიდე წილი.

¹⁹პირი შენი მიშვებული გაქვს სიავეზე და შენი ენა სიყალბეს თხზავს.

²⁰დაჯდები და შენი ძმის წინააღმდეგ ლაპარაკობ, დედაშენის შვილის შერცხვენას ცდილობ.

²¹ამას ჩადიოდი და მე ვდუმდი; გეგონა, რომ შენი მსგავსი ვარ; აწ კი გამხილებ და შენს თვალწინ დაგიმტკიცებ.

²²ჩაუფიქრდით ამას, ღმერთის დამვიწყებელნო, თორემ მოგსპობთ და აღარ იქნება მშველელი!

²³მადლობის მსხვერპლის შემომწირავი განმადიდებს მე, სწორ გზაზე მდგომს ვუჩვენებ მე შველას ღმრთისას!