Read ქართული ბიბლია, სრული ვერსია Psalms 54 Bible Online

Psalms 54 - ქართული ბიბლია, სრული ვერსია bible

Psalms 54

¹გუნდის ლოტბარს. სიმებიან საკრავზე. მოძღვრება დავითისა.

²ისმინე, ღმერთო, ჩემი ლოცვა, ნუ დაემალები ჩემს ვედრებას!

³ყური მომაპყარ და მიპასუხე; მწუხარება დამეუფლა,

⁴გონება დავკარგე მტრის ხმისაგან, ბოროტთა შევიწროებისაგან, რადგან სიმრუდეს მაბრალებენ და სიძულვილით მირისხდებიან.

⁵ჩემი გული თრთის ჩემს შიგნით, სიკვდილის საშინელება დამატყდა თავს.

⁶შიში და ძრწოლა დამეუფლა და შიშის ზარი მიპყრობს.

⁷და ვამბობ: ო, რომ მქონოდა მტრედის ფრთები! გავფრინდებოდი და სიმშვიდეს მოვიპოვებდი;

⁸შორს, შორს გადავიხვეწებოდი, უდაბნოში დავიდებდი ბინას;

⁹ვიჩქარებდი, რომ მეპოვა თავშესაფარი მრისხანე ქარიშხლისაგან.

¹⁰ჩაშალე მათი გეგმები, უფალო, დაყავი მათი ენები; რადგანაც ვხედავ ძალადობას და შუღლს ქალაქში.

¹¹დღედაღამ გარს უვლიან მის კედლებს, სიმრუდე და უბედურებაა მასში,

¹²ნგრევაა მის შუაგულში, არ სცილდება მის ქუჩებს სიცრუე და ვერაგობა.

¹³ვინც მე მლანძღავს, ჩემი მტერი არ არის — ამას ავიტანდი; ჩემი მოძულენი კი არ განდიდებულან ჩემზე — მათ დავემალებოდი;

¹⁴არამედ ეს შენ ხარ, კაცი, ჩემი სწორი, ამხანაგი და მეგობარი ჩემი,

¹⁵ერთად რომ ვსაუბრობდით ტკბილად, ღვთის სახლში დავდიოდით მეგობრულად.

¹⁶დაატყდეს მათ სიკვდილი, ცოცხლად ჩავიდნენ ჯოჯოხეთში, რადგან ბოროტებაა მათ სადგომში, მათ გულში.

¹⁷მე კი ღმერთს მოვუხმობ, და უფალი მიშველის.

¹⁸საღამოს, დილით და შუადღისას შევევედრები და შევტირებ და ის შეისმენს ჩემს ხმას.

¹⁹მშვიდობით გადაარჩენს ჩემს სულს მათგან, მე რომ მებრძვიან, რადგან ბევრნი არიან ჩემზე აღმდგარნი.

²⁰შეისმენს ღმერთი, მოათვინიერებს მათ დასაბამიდან მყოფი; რადგან არ არის ცვლილება მათში და არა აქვთ შიში ღმერთისა.

²¹მან ხელი გაიწოდა მისთვის მშვიდობის მსურველთა წინააღმდეგ, აღთქმა დაარღვია.

²²ქონზე ჩვილია მისი ბაგენი, გულში კი ომი აქვს; ზეთზე რბილია მისი სიტყვები, მაგრამ ისინი გაშიშვლებული ხმლებია.

²³მიანდე უფალს შენი ბედი და ის განგამტკიცებს, არასოდეს არ დაუშვებს მართლის წაბორძიკებას.

²⁴ღმერთო, შენ ჩაიყვან მათ უძირო უფსკრულში; სისხლის მოყვარულნი და ვერაგნი ვერ მიაღწევენ თავიანთ დღეთა ნახევარს. მე კი შენ გესავ.