Read ქართული ბიბლია, სრული ვერსია Psalms 61 Bible Online

Psalms 61 - ქართული ბიბლია, სრული ვერსია bible

Psalms 61

¹გუნდის ლოტბარს. იედუთუნისთვის. ფსალმუნი დავითისა.

²მხოლოდ ღმერთს ელის მდუმარედ სული ჩემი; მისგან არის ჩემი ხსნა.

³მხოლოდ ის არის ჩემი კლდე და ჩემი ხსნა, ჩემი მაღალი კოშკი; არ დავეცემი.

⁴როდემდე დაესხმით თავს ადამიანს, შეეცდებით მის წაქცევას, როგორც დაკიდული კედლისა, მორყეული ყორისა?

⁵განიზრახეს სიმაღლიდან მისი გადმოგდება; მიმართავენ სიცრუეს; პირით აკურთხებენ, გულით კი სწყევლიან.

⁶მხოლოდ ღმერთს ელოდება ჩემი სული მდუმარედ; რადგან მისგან არის ჩემი იმედი.

⁷მხოლოდ ის არის ჩემი კლდე და ჩემი ხსნა, ჩემი სიმაგრე; არ დავეცემი.

⁸ღმერთისგან არის ჩემი ხსნა და ჩემი ღირსება; ღმერთი არის ჩემი კლდე და თავშესაფარი.

⁹მას მიენდეთ ყოველჟამს, ხალხნო, თქვენი გული გადმოღვარეთ მის წინაშე! ღმერთია ჩვენი თავშესაფარი.

¹⁰არარაობა არიან მდაბიონი, ცრუობენ დიდების მქონენი; სასწორზე რომ დადო, ყველა ერთად არარაობაზე ნაკლები იქნება.

¹¹ნუ დაამყარებთ იმედს მძარცველობაზე, მტაცებლობას ნუ გამოედევნებით; თუ დოვლათი გაიზრდება, გულს ნუ მიაპყრობთ მას.

¹²ერთხელ თქვა ღმერთმა, ორჯერ მოვისმინე, რომ ღმერთისაა ძალა.

¹³და შენი არს, უფალო, წყალობა, რადგან შენ მიუზღავ თითოეულს მისი საქმისამებრ.