Read ქართული ბიბლია, სრული ვერსია Psalms 68 Bible Online

Psalms 68 - ქართული ბიბლია, სრული ვერსია bible

Psalms 68

¹გუნდის ლოტბარს. შოშანისებურად. დავითისა.

²მიხსენი, ღმერთო! რადგან ყელამდე მომადგა წყალი.

³ჩავიძირე გაუვალ ლაფში, არ არსებობს ფეხის დასადგამი; შევედი წყლის სიღრმეში და სწრაფმა დინებამ წამიღო.

⁴მოვიქანცე ღაღადით, ყელი გამიშრა, თვალები ამომიღამდა ჩემი ღმერთის მოლოდინში.

⁵უმიზეზოდ მოძულე მეტი მყავს, ვიდრე თმა თავზე. გაძლიერდნენ ჩემი მოსპობის მსურველნი, ჩემზე ტყუილ-უბრალოდ გადამტერებულნი; რაც არ წამირთმევია, უნდა დავაბრუნო.

⁶ღმერთო, შენ უწყი ჩემი უგუნურება; ჩემი დანაშაული დაფარული არ არის შენგან.

⁷ნუ შერცხვებიან ჩემს გამო შენი მოიმედენი, ღმერთო, უფალო, ღმერთო ძალთაო; ნუ გაწბილდებიან ჩემს გამო შენი მაძიებელნი, ღმერთო ისრაელისა.

⁸რადგანაც შენთვის მივიღე ლანძღვა, სირცხვილმა დაფარა ჩემი სახე.

⁹შორეული გავხდი ჩემი ძმებისათვის, უცხო — დედაჩემის შვილთათვის.

¹⁰რადგან შენი სახლის შურმა შემჭამა მე და შენთა მლანძღველთა ლანძღვა დამატყდა თავს.

¹¹როდესაც ვტიროდი ჩემი სულის მარხვით, მათი სალანძღავი გავხდი;

¹²როცა ჩავიცვი სამოსად ძაძა, იგავად ვიქეცი მათთვის.

¹³ჩემზე ლაპარაკობენ კარიბჭესთან მსხდომნი, და ჩემზე მღერიან ღვინის მსმელები.

¹⁴მე კი შენს მიმართ ვლოცულობ, უფალო, სასურველ დროს; ღმერთო, შენი დიდი წყალობით მიპასუხე.

¹⁵მიხსენ ჭაობისაგან, რომ არ დავინთქა; გადამარჩინე მოძულეთაგან და წყლის სიღრმეთაგან.

¹⁶ნუ გამიტაცებს წყლის ტალღა, ნუ ჩამყლაპავს მორევი, ნუ შეიკრავს ჩემზე პირს ჭა.

¹⁷მიპასუხე, უფალო, რადგან კეთილია შენი წყალობა; შენი დიდი სიბრალულით გადმომხედე.

¹⁸ნუ დაფარავ სახეს შენი მორჩილისგან, რადგან მიჭირს; მსწრაფლ მიპასუხე.

¹⁹მოუახლოვდი ჩემს სულს, გამომიხსენი; გამომისყიდე ჩემი მტრების გამო!

²⁰შენ იცი ჩემი ლანძღვა, გაწბილება და შერცხვენა ჩემი; შენს თვალწინ არიან ჩემი მტრები.

²¹დამცირებამ დაამსხვრია ჩემი გული, ქანცი გამიწყდა; ველოდი თანამგრძნობს და არავინ იყო, მანუგეშებელს, — და ვერ ვპოვე.

²²შეურიეს ჩემს საჭმელში ნაღველი, წყურვილის დროს ძმარი შემასვეს.

²³იყოს მათი ტაბლა მათთვის ხაფანგი და მშვიდად მყოფთათვის — მახე.

²⁴დაუბნელდეთ მათ თვალები და წელი მათი სამუდამოდ მოადუნე.

²⁵გადმოაფრქვიე მათზე შენი მრისხანება, და შენი რისხვის ალი ეწიოთ მათ.

²⁶სამკვიდრებელი მათი გაპარტახდეს, მათ კარვებში არ იყოს მკვიდრი!

²⁷ვინაიდან, ვინც შენ გვემე, დევნიან, და შენგან დაჭრილის სატკივარს ამრავლებენ.

²⁸დაურთე მათ სასჯელი სასჯელზე; ნუმც შეაღწევენ შენს სიმართლეში.

²⁹ამოიშალონ ცოცხალთა წიგნიდან, მართლებთან ნუ ჩაიწერებიან.

³⁰ხოლო მე ღატაკი და დავრდომილი ვარ; შენმა შველამ, ღმერთო, ამამაღლოს მე!

³¹შევაქებ ღმერთის სახელს გალობით, განვადიდებ მადლიერებით.

³²ეს უფრო სათნო იქნება უფლისთვის, ვიდრე ხარი ან ხბო რქიანი და ჩლიქიანი.

³³ნახონ მოკრძალებულებმა და გაიხარონ, გაცოცხლდეს გული თქვენი, მაძიებელნო ღმრთისა.

³⁴რადგან უსმენს ღატაკს უფალი და არ უგულებელყოფს თავისიანებს ტყვეობაში.

³⁵განადიდოს იგი ცამ და დედამიწამ, ზღვებმა და ყოველმა, რაც მათში მოძრაობს.

³⁶რადგან იხსნის ღმერთი სიონს და აღადგენს იუდას ქალაქებს, იქ დასახლდებიან და დამკვიდრდებიან მისი მსახურნი.

³⁷მის მორჩილთა შთამომავლობა დაეუფლება მას, და მისი სახელის მოყვარულნი იცხოვრებენ მასში.