Read ქართული ბიბლია, სრული ვერსია Psalms 72 Bible Online

Psalms 72 - ქართული ბიბლია, სრული ვერსია bible

Psalms 72

¹ფსალმუნი ასაფისა. ჭეშმარიტად, კეთილია ღმერთი ისრაელის მიმართ, გულწრფელთა მიმართ.

²მე კი — კინაღამ გადაუხვიეს ჩემმა ფეხებმა, კინაღამ მომიცურდა ნაბიჯები!

³რადგან შემშურდა უგუნურთა, როდასაც დავინახე ბოროტთა კეთილდღეობა.

⁴რადგან არა აქვთ შეჭირვება, ჯანსაღი და მრთელია მათი გვამი.

⁵არ იტანჯებიან სხვა კაცთა მსგავსად, სხვა ადამიანებივით არ ტვირთმძიმობენ.

⁶ამიტომ მძივივით გარს შემოერტყა მათ ამპარტავნება და ძალადობით, როგორც სამოსელით, არიან მოსილნი.

⁷სიმსუქნისაგან თვალები გადმოკარკლეს, გულები სიბრიყვით აევსოთ.

⁸ავად და დამცინავად ლაპარაკობენ, ძალადობით იმუქრებიან.

⁹მათი პირი ცას მისწვდა და მათი ენა დედამიწაზე დაიარება.

¹⁰ამიტომ მისი ხალხიც აქეთ მიიქცევა და სვამენ წყალს სავსე თასიდან.

¹¹ამბობენ: როგორ შეიტყობს ღმერთი? განა უზენაესს შეუძლია გაგება?

¹²აჰა, ესენი არიან ბოროტნი, უზრუნველნი ამა სოფლისა, იხვეჭენ დოვლათს.

¹³ამაოდ გამისუფთავებია გული, დამიბანია ხელები სიწმიდით,

¹⁴რადგან გვემა იყო ჩემი ხვედრი ყოველდღე, და ვიტანჯებოდი ყოველ დილით.

¹⁵რომ მეთქვა: ვიმსჯელებ ასე, მაშინ შენი შვილების თაობას ვუღალატებდი.

¹⁶მაგრამ როდესაც ვფიქრობდი, თუ როგორ გამეგო ეს — ძნელი ჩანდა ეს ჩემს თვალში —

¹⁷ვიდრე მოვიდოდი ღმერთის ტაძარში და გავიგებდი მათ ბოლოს.

¹⁸ნამდვილად მოლიპულ გზაზე დააყენე ისინი და უფსკრულში გადაჩეხავ.

¹⁹როგორ მეყსეულად ნადგურდებიან, აღიგვებიან შიშის ზარისგან!

²⁰როგორც სიზმარი ქარწყლდება გამოღვიძების შემდეგ, ისე დაამცირებ მათ სახეებს, უფალო, როცა გამოფხიზლდები.

²¹როდესაც გული მიმწარდებოდა და შიგანი მეფლითებოდა,

²²უმეცარი ვიყავი და ვერ ვხვდებოდი, პირუტყვივით ვიყავი შენს წინაშე.

²³მაგრამ მაინც მე მუდამ შენთან ვარ, ხელთ გიპყრია მარჯვენა ჩემი.

²⁴შენი რჩევით მიმიძღვები წინ, შემდგომ კი პატივში მიმიღებ.

²⁵ვინ არის ჩემთვის ზეცაში შენს გარდა? შენს გარდა არავინ მსურს არც დედამიწაზე.

²⁶ქანცგამოლეულია ჩემი სხეული და გული; მაგრამ ღმერთია ჩემი გულის სიმაგრე და ჩემი ხვედრი უკუნისამდე.

²⁷რადგან აჰა, შენგან განშორებულნი დაიღუპებიან; შენ მოსპობ ყველას, ვინც გიორგულებს.

²⁸ხოლო ჩემთვის სასიკეთოა ღმერთთან სიახლოვე; უფალ ღმერთზე ვამყარებ იმედს, რათა ვაუწყო ყველა შენი საქმე.