Read ქართული ბიბლია, სრული ვერსია Psalms 76 Bible Online

Psalms 76 - ქართული ბიბლია, სრული ვერსია bible

Psalms 76

¹გუნდის ლოტბარს. იედუთუნისთვის. ასაფის ფსალმუნი.

²ჩემი ხმა ღმერთის მიმართაა და მე შევღაღადებ მას; ჩემი ხმა ღმერთის მიმართაა და ის მომისმენს.

³ჩემი გაჭირვების დღეს უფალს ვეძიებ; ღამღამობით გაწვდილია ჩემი ხელი და არ ივანებს, უარყოფს ნუგეშს სული ჩემი.

⁴ვიხსენებ ღმერთს და ვკვნესი, ვფიქრობ, და უძლურდება სული ჩემი.

⁵თვალიც არ მომახუჭინე, შევძრწუნდი და ხმას ვეღარ ვიღებ.

⁶ვიგონებ ადრინდელ დღეებს, გარდასულ წლებს;

⁷ვიხსენებ ჩემს გალობას ღამღამობით, ჩემს გულს ვესაუბრები, სული ჩემი ეძიებს პასუხს:

⁸ნუთუ საუკუნოდ მიმატოვებს უფალი და აღარასოდეს მომისურვებს?

⁹ნუთუ სამუდამოდ გაქრა მისი წყალობა, სამარადჟამოდ დასრულდა მისი აღთქმანი?

¹⁰სამუდამოდ დაივიწყა შეწყალება ღმერთმა? უარყო რისხვით სიბრალული?

¹¹და ვთქვი: ჩემი უბედურება უზენაესის მარჯვენის შეცვლაა.

¹²გავიხსენებ უფლის საქმეებს, ჭეშმარიტად გავიხსენებ შენს ძველ სასწაულებს.

¹³ჩავუკვირდები ყველა შენს საქმეს, დავფიქრდები შენს ნამოქმედარზე.

¹⁴ღმერთო, წმიდაა შენი გზა! რომელი ღმერთია შენსავით დიდი?

¹⁵შენა ხარ ღმერთი, სასწაულთმოქმედი; შენ გამოავლინე ერებზე ძლიერება შენი.

¹⁶შენი მკლავით გამოიხსენი შენი ერი — იაკობისა და იოსების ძენი.

¹⁷როდესაც გიხილეს წყლებმა, ღმერთო, როდესაც გიხილეს წყლებმა, შეძრწუნდნენ, ზღვათა უფსკრულებიც კი შეიძრნენ.

¹⁸გადმოღვარეს წყლები ღრუბლებმა, დაიქუხეს ცათა, შენმა ისრებმა იელვეს.

¹⁹შენი გრგვინივის ხმამ დაიგრგვინა ცის თაღზე — გაანათეს ელვებმა სამყარო, შეძრწუნდა და შეირყა დედამიწა.

²⁰ზღვაში გაიარა შენმა გზამ და შენმა ბილიკმა — დიდ მდინარეებში, და მაინც შენი კვალი უცნობი დარჩა.

²¹ფარასავით მიუძღოდი შენ შენს ხალხს მოსესა და აარონის ხელით.