Read ქართული ბიბლია, სრული ვერსია Psalms 79 Bible Online

Psalms 79 - ქართული ბიბლია, სრული ვერსია bible

Psalms 79

¹გუნდის ლოტბარს. შოშანისებურად. ასაფისა. ფსალმუნი.

²ყური მომაპყარ, მწყემსო ისრაელისა, წინ რომ უძღოდი იოსებს, ვითარცა ცხვარს! ქერუბიმებზე ამხედრებულო, გამოგვეცხადე.

³ეფრემის, ბენიამინისა და მანაშეს წინაშე აღაგზნე შენი ძალა და გამოეშურე ჩვენს სახსნელად!

⁴ღმერთო! მოგვაქციე ჩვენ; დაე გაბრწყინდეს სახე შენი და დავიხსნებით!

⁵უფალო, ღმერთო ძალთაო, როდემდე იქნები განრისხებული შენი ხალხის ლოცვის მიმართ?

⁶გამოკვებე ისინი ცრემლიანი პურით და შეასვი თასი, ცრემლებით სავსე.

⁷დაგვსვი გასაკიცხად ჩვენს მეზობლებში, და ჩვენი მტრები აბუჩად გვიგდებენ.

⁸ღმერთო ძალთაო, მოგვაქციე ჩვენ, დაე გაბრწყინდეს სახე შენი და დავიხსნებით!

⁹ეგვიპტიდან გადმოიტანე ვაზი, განდევნე ერები და დანერგე ის;

¹⁰გაწმინდე ადგილი მის წინ, გაადგმევინე ფესვები და აავსო ქვეყანა.

¹¹მთები დაფარა მისმა ჩრდილმა და მისმა რქებმა — მაღალი კედრები;

¹²რქები გაიტანა ზღვამდე და მდინარემდე — ტოტები თვისი.

¹³რატომ დაანგრიე ზღუდენი მისნი, ისე რომ ყოველი გამვლელი ძარცვავს მას?

¹⁴ანადგურებს მას ტყიური ტახი და ველის ნადირნი კორტნიან მას.

¹⁵შემობრუნდი, ღმერთო ძალთაო! გადმოგვხედე ზეციდან და იხილე, და მოხედე ამ ვაზს.

¹⁶გაამაგრე ის, რაც დანერგა შენმა მარჯვენამ, ყლორტი, შენთვის რომ გააძლიერე!

¹⁷დაწვეს ცეცხლით, აკაფეს; შენი სახის რისხვით იღუპებიან.

¹⁸იყოს შენი ხელი შენი მარჯვენის კაცზე, ადამის ძეზე, შენთვის რომ გააძლიერე!

¹⁹ჩვენ კი არასდროს არ უკუვდგებით შენგან, გვაცოცხლე და შენს სახელს მოვუხმობთ!

²⁰უფალო, ღმერთო ძალთაო, მოგვაქციე ჩვენ, დაე გაბრწყინდეს სახე შენი და დავიხსნებით!