Read ქართული ბიბლია, სრული ვერსია Psalms 80 Bible Online

Psalms 80 - ქართული ბიბლია, სრული ვერსია bible

Psalms 80

¹გუნდის ლოტბარს, გითითის ხმაზე. ასაფისა.

²უგალობეთ ღმერთს, სიმაგრეს ჩვენსას; სიხარულით შეჰღაღადეთ იაკობის ღმერთს!

³აამაღლეთ სიმღერა, დაუკარით დაირა, ტკბილხმიანი ქნარი ებანთან ერთად.

⁴ჩაჰბერეთ ბუკს ახალმთვარეობისას, სავსე მთვარეზე, ჩვენს დღესასწაულზე.

⁵რადგან ეს არის კვალი ისრაელისა, წესდება იაკობის ღმერთისა.

⁶ეს დაადგინა მან მოწმობად იოსებისთვის, რაჟამს გამოვიდა ეგვიპტის ქვეყნიდან;

⁷ენა, რომელიც არ იცოდა, ისმინა: „მოვხსენი ტვირთი მხრებიდან, ხელები გავუთავისუფლე გოდრისაგან.

⁸გაჭირვებაში მომიხმე და გიხსენი, გიპასუხე ქუხილის იდუმალი საუფლოდან, გამოგცადე მერიბას წყლებზე.

⁹ისმინე, ჩემო ხალხო, და გიმოწმებ! ისრაელო, თუ მომისმენ მე!

¹⁰არ იყოს შენში სხვა ღმერთი, თაყვანი არ სცე უცხო ღმერთს.

¹¹მე ვარ უფალი, ღმერთი შენი, შენი გამომყვანი ეგვიპტის ქვეყნიდან; განავრცე პირი შენი და მე აღვავსებ მას.

¹²მაგრამ არ ისმინა ჩემმა ხალხმა ჩემი ხმა, და ისრაელი არ დამემორჩილა.

¹³მაშინ მივუშვი ისინი თავიანთ გულისწადილზე, დაე იარონ თავიანთ ნებაზე.

¹⁴ჩემს ხალხს რომ ესმინა ჩემი და ისრაელს ჩემს გზაზე ევლო,

¹⁵მალე მოვდრეკდი მათს მტრებს და მათს მჩაგვრელებზე ხელს აღვმართავდი.

¹⁶უფლის მოძულენი ლიქნას დაუწყებდნენ და მათი ჟამი იქნებოდა სამარადისო.

¹⁷ნოყიერი ხორბლით გამოვკვებავდი და კლდის თაფლით გავაძღობდი.“