Read ქართული ბიბლია, სრული ვერსია Psalms 82 Bible Online

Psalms 82 - ქართული ბიბლია, სრული ვერსია bible

Psalms 82

¹გალობა. ფსალმუნი ასაფისა.

²ღმერთო, ნუ დადუმდები, ყურს ნუ დაიხშავ და ნუ დამშვიდდები!

³რადგან აჰა, შენი მტრები ღრიალებენ, და შენმა მოძულეებმა თავი წამოყვეს.

⁴შენი ხალხის წინააღმდეგ საიდუმლოდ მზაკვრობენ და თათბირობენ მათ წინააღმდეგ, შენ რომ იფარავ.

⁵თქვეს: მოდით, ამოვძირკვოთ ისინი, როგორც ერი და აღარ იხსენიებოდეს სახელი ისრაელისა!

⁶მოითათბირეს ერთსულოვნად, შენს წინააღმდეგ შეკრეს პირობა;

⁷ედომის ბანაკებმა და ისმაელიანებმა, მოაბმა და აგარის ნაშიერმა;

⁸გებალმა, ყამონმა და ყამალეკმა, ფილისტიმელებმა ცორელებთან ერთად.

⁹აშურიც მათ დაუკავშირდა, და შეიქნენ მკლავნი ლოტის ძეთათვის.

¹⁰ჰქმენ ისინი, როგორც მიდიანი, როგორც სისერა, როგორც იაბინი კიშონის ხევზე;

¹¹რომლებიც განადგურდნენ ყენ-დორში, გადაიქცნენ მინდვრის სასუქად.

¹²დამართე მათ დიდებულებს იგივე, რაც ყორებს და ზეებს, რაც ზებახს და ცალმუნაყს, და ყველა მათ მთავარს,

¹³რომელნიც ამბობდნენ: დავიმკვიდროთ ჩვენთვის სამკვიდრებელი ღვთისა.

¹⁴ღმერთო ჩემო, ჰყავ ისინი ვითარცა ბზე, ვითარცა ნამჯა ქარში;

¹⁵როგორც ცეცხლი წვავს ტყეს, და ალი ბუგავს მთებს,

¹⁶ისე დაედევნე მათ შენი რისხვით, და შენი ქარიშხლით შეაძრწუნე ისინი!

¹⁷აავსე მათი პირი სირცხვილით, რათა ეძიონ შენი სახელი, უფალო.

¹⁸შერცხვნენ და შეძრწუნდნენ სამუდამოდ, შერცხვენილნი დაიღუპონ.

¹⁹მიხვდნენ, რომ შენი სახელია უფალი, და მხოლოდ შენა ხარ უზენაესი მთელ ქვეყანაზე.