Read ქართული ბიბლია, სრული ვერსია Psalms 83 Bible Online

Psalms 83 - ქართული ბიბლია, სრული ვერსია bible

Psalms 83

¹გუნდის ლოტბარს. გითითის ხმაზე. კორახის ძეთა. ფსალმუნი.

²რაოდენ სასურველია შენი სადგომები, უფალო ძალთა!

³ნატრობს და ელტვის ჩემი სული უფლის ეზოებს; გული ჩემი და სხეული ჩემი უმღერიან ცოცხალ ღმერთს.

⁴ჩიტიც კი პოულობს ბინას და მერცხალი ბუდეს, რომ ჩასხას თავისი ბარტყები შენს საკურთხევლებთან, უფალო ძალთა, მეუფევ ჩემო და ღმერთო ჩემო!

⁵კურთხეულ არიან შენს სახლში მკვიდრნი, მარადჟამს შენი მადიდებელნი იქნებიან ისინი!

⁶ნეტარ არიან კაცნი, რომელთა ძლიერებაც შენშია, რომელთა გულშიც სიონისკენ აღმავალი გზაა.

⁷ხრიოკ ველზე გავლისას მას წყაროდ გადააქცევენ, კურთხევით დაფარავს მათ ადრეული წვიმა.

⁸ძლიერებიდან ძლიერებისკენ ივლიან, ღმერთის წინაშე გამოცხადდებიან სიონში.

⁹უფალო, ღმერთო ძალთაო, ისმინე ჩემი ლოცვა, ყური მომაპყარ, ღმერთო იაკობისა!

¹⁰იხილე ჩვენი ფარი, იხილე, ღმერთო, მოხედე შენი ცხებულის სახეს!

¹¹რადგან ერთი დღე შენს ეზოებში სჯობს სხვაგან ათასს; ჩემი ღმერთის სახლის ზღურბლთან დგომას ვარჩევ ბოროტთა კარვებში ბინადრობას.

¹²რადგან მზე და ფარია უფალი ღმერთი. მადლისა და ღირსების მომნიჭებელია უფალი, სიკეთეს არ მოაკლებს უბიწოდ მოარულთ.

¹³უფალო ძალთა! კურთხეულია კაცი, შენზე მონდობილი!