Read ქართული ბიბლია, სრული ვერსია Psalms 84 Bible Online

Psalms 84 - ქართული ბიბლია, სრული ვერსია bible

Psalms 84

¹გუნდის ლოტბარს. კორახის ძეთა. ფსალმუნი.

²უფალო, შენ მოწყალე იყავი შენი ქვეყნისათვის, შენ აღადგინე კეთილდღეობა იაკობისა,

³მიუტევე ურჯულოება შენს ხალხს, დაფარე ყველა მისი ცოდვა.

⁴შენ აგვარიდე შენი გულისწყრომა, დააცხრე შენი მრისხანება.

⁵მოგვაქციე ჩვენ, ჩვენი ხსნის ღმერთო, და წარხოცე შენი რისხვა ჩვენზე!

⁶ნუთუ სამუდამოა შენი მრისხანება, თაობიდან თაობამდე გააგრძელებ შენს რისხვას ჩვენზე?

⁷ნუთუ აღარ დაგვიბრუნებ სიცოცხლეს, რათა შენმა ხალხმა იხაროს შენით?

⁸გვიჩვენე, უფალო, წყალობა შენი და გვიბოძე შემწეობა შენი.

⁹მე კი შევისმენ, რას იტყვის უფალი ღმერთი; რადგან მშვიდობას ეტყვის ის თავის ხალხს, თავის წმიდებს, და ისინი აღარ დაუბრუნდებიან უგუნურებას.

¹⁰მართლაც ახლოა ხსნა მისმიერი მის მოშიშთათვის, რათა დიდებამ დაისადგუროს ჩვენს ქვეყანაში.

¹¹წყალობა და ჭეშმარიტება შეხვდებიან ერთმანეთს, სიმართლე და მშვიდობა ეამბორებიან ერთიმეორეს.

¹²ჭეშმარიტება აღმოცენდება დედამიწიდან და სიმართლე ზეციდან გადმოიხედავს.

¹³აჰა, უფალი გვიბოძებს სიკეთეს და ჩვენი მიწა გამოსცემს ნაყოფს.

¹⁴სიმართლე ივლის მის წინ და გზას გაუკაფავს მის ნაბიჯებს.