Read ქართული ბიბლია, სრული ვერსია Psalms 85 Bible Online

Psalms 85 - ქართული ბიბლია, სრული ვერსია bible

Psalms 85

¹ლოცვა დავითისა. ყური მომაპყარ, უფალო და მიპასუხე, რადგან ღარიბი და ღატაკი ვარ მე.

²დაიფარე სული ჩემი, რადგან ღვთისმოსავი ვარ მე; იხსენ მორჩილი შენი, რომელიც შენ გესავს.

³შენ ხარ ჩემი ღმერთი; შემიწყალე, უფალო, რადგან შენ მოგიხმობ ყოველდღე.

⁴გაახარე სული შენი მორჩილისა, რადგან, უფალო, შენსკენ აღვაპყრობ ჩემს სულს.

⁵რადგან კეთილი და შემბრალე ხარ შენ, უფალო, და დიდად მოწყალე ყველასთვის, ვინც შენ მოგიხმობს.

⁶ისმინე, უფალო, ლოცვა ჩემი და ყურად იღე ჩემი მუდარა,

⁷ჩემი გაჭირვების დღეს მოგიხმობ, რადგან შენ მიპასუხებ მე.

⁸არ არსებობს შენი მსგავსი ღმერთებს შორის, და არც მსგავსი საქმეთა შენთა.

⁹ყოველი ერი, შექმნილი შენგან, მოვა და მუხლს მოიდრეკს შენს წინაშე, უფალო, და განადიდებს შენს სახელს;

¹⁰რადგან დიდი ხარ და სასწაულთმოქმედი, მხოლოდ შენა ხარ ღმერთი.

¹¹მასწავლე, უფალო, შენი გზა, რათა ვიარო შენი ჭეშმარიტებით. წარმართე ჩემი გული შენი სახელის მოშიშებით.

¹²მადლობას გწირავ, უფალო, ღმერთო ჩემო, მთელი გულით და ვადიდებ შენს სახელს უკუნისამდე.

¹³რადგან დიდია შენი წყალობა ჩემს მიმართ, შენ იხსენი ჩემი სული შავეთის უფსკრულთაგან.

¹⁴ღმერთო! ამპარტავანნი აღდგნენ ჩემს წინააღმდეგ და მტარვალთა კრებული ეძიებს ჩემს სულს, და არად შეგრაცხეს თავიანთ წინაშე.

¹⁵შენ კი, უფალო, შენ ხარ ღმერთი შემბრალე და მადლმოსილი, ნელი რისხვაში, დიდად მოწყალე და ჭეშმარიტი.

¹⁶მოიქეც ჩემსკენ და შემიწყალე, უბოძე შენი ძალა შენს მორჩილს და იხსენ ძე შენი მხევლისა.

¹⁷მიჩვენე ნიშანი შენი სიკეთისა, რათა იხილონ ჩემმა მოძულეებმა და შერცხვნენ, რადგან შენ, უფალო, შემეწიე და მანუგეშე მე.