Read ქართული ბიბლია, სრული ვერსია Psalms 87 Bible Online

Psalms 87 - ქართული ბიბლია, სრული ვერსია bible

Psalms 87

¹გალობა. ფსალმუნი კორახის ძეთა. გუნდის ლოტბარს. მახალათის ხმაზე საგალობლად. მოძღვრება ჰემან ეზრახელისა.

²უფალო, ღმერთო ჩემი ხსნისა, შენს წინაშე ვღაღადებ დღისით და ღამით!

³მოვიდეს შენს წინაშე ჩემი ლოცვა, ყური მოაპყარ ვედრებას ჩემსას!

⁴რადგან აღივსო წუხილით სული ჩემი და ჩემი სიცოცხლე ჯოჯოხეთს უახლოვდება.

⁵შევირაცხე მათ გვერდით, ვინც სამარეში ჩადის, შევიქენი, ვითარცა კაცი უძლური,

⁶მკვდრებს შორის ჩაგდებული, განგმირული, სამარეში მდებარე, ვისაც აღარც იხსენებ, რადგან შენი ხელით არის განგმირული.

⁷მომათავსე ქვესკნელის ორმოში, წყვდიადსა და სიღრმეში.

⁸თავს დამატყდა შენი რისხვა, და ყველა შენმა ტალღამ ჩემზე გადაიარა.

⁹შენ განმაშორე ჩემი ნაცნობნი, საზიზღარი გამხადე მათთვის; დატყვევებული ვარ და ვერ გამოვდივარ.

¹⁰თვალი დამებინდა ტანჯვით; მოგიხმობდი, უფალო, ყოველდღე, შენსკენ ვიწვდიდი ხელებს.

¹¹განა მკვდრებისთვის იქმ სასწაულებს? განა მიცვალებულნი წამოდგებიან და მადლობას შემოგწირავენ?

¹²განა საფლავში ილაპარაკებენ შენს წყალობაზე, და ჯოჯოხეთში — შენს ჭეშმარიტებაზე?

¹³განა შეიცნობენ წყვდიადში შენს სასწაულებს და შენს სიმართლეს — დავიწყების ქვეყანაში?

¹⁴მე კი, უფალო, შენ გევედრები, განთიადისას ჩემი ლოცვა წინ გეგებება.

¹⁵რად მიატოვე, უფალო, სული ჩემი, შენი პირისახე დაფარე ჩემგან?

¹⁶საწყალი და ტანჯული ვარ ყრმობიდანვე, შენს საშინელებებს ვზიდავ; დავუძლურდი.

¹⁷თავზე გადამიარა შენმა რისხვამ, შიშის ზარმა გამანადგურა.

¹⁸მთელი დღე წყალივით გარს მივლიდნენ, გარს მერტყმოდნენ ყველანი ერთად.

¹⁹შენ განმაშორე მოყვასი და მეგობარი, ჩემი ნაცნობნი ბნელით მოცულან.