Read ქართული ბიბლია, სრული ვერსია Psalms 88 Bible Online

Psalms 88 - ქართული ბიბლია, სრული ვერსია bible

Psalms 88

¹მოძღვრება. ეთან ეზრახელისა.

²მარადჟამს ვუგალობებ უფლის წყალობებს, თაობებს აუწყებს შენს ჭეშმარიტებას ჩემი პირი.

³რადგან ვთქვი: უკუნისამდე დაფუძნდება წყალობა შენი, ცათა შინა განამტკიცებ ჭეშმარიტებას შენსას.

⁴შენ თქვი: „შევკარ პირობა ჩემს რჩეულთან, შევფიცე დავითს, ჩემს მსახურს:

⁵‘უკუნისამდე დავადგენ შენს შთამომავლობას და თაობიდან თაობამდე დავაფუძნებ შენს ტახტს.’“

⁶განადიდებენ ზეცანი შენს საოცრებებს, უფალო, შენს ჭეშმარიტებას წმიდათა კრებულში!

⁷რადგან ვინ შეედრება ზეცაში უფალს, ვინ მიემსგავსება უფალს ღვთის შვილთა შორის?

⁸დიდებულია ღმერთი წმიდათა კრებულში, და საშიშია ყველასთვის ირგვლივ.

⁹უფალო, ღმერთო ძალთაო! ვინ არის შენებრ მძლავრი? შენი ჭეშმარიტება შენს გარშემოა!

¹⁰შენ ბატონობ ზღვის მოქცევაზე, შენ ამშვიდებ აბობოქრებულ ტალღებს.

¹¹დაამსხვრიე რაჰაბი, როგორც განგმირული; ძლიერი მკლავით გაფანტე მტრები.

¹²შენია ცანი, დედამიწაც შენია; სამყარო და მისი სავსება შენ დააფუძნე.

¹³ჩრდილოეთი და სამხრეთი შენ შეჰქმენი; თაბორი და ხერმონი შენს სახელს უმღერიან.

¹⁴შენია მკლავი მაგარი; ძლიერია ხელი შენი, მაღალია მარჯვენა შენი.

¹⁵სიმართლე და მართლმსაჯულებაა შენი ტახტის საფუძველი, წყალობა და ჭეშმარიტება შენი სახის წინაშე დადიან.

¹⁶კურთხეულია ხალხი, რომელიც სცნობს საზეიმო ხმებს, რომელნიც შენი სახის შუქით დადის, უფალო;

¹⁷ვინც შენი სახელით ილხენს ყოველდღე და შენს სიმართლეს ადიდებს.

¹⁸რადგან შენა ხარ დიდება მათი ძალისა, და შენი ნებით ამაღლდება ჩვენი რქა.

¹⁹რადგან უფალი არის ჩვენი ფარი და ისრაელის წმიდა — მეუფე ჩვენი.

²⁰მაშინ დაელაპარაკე ხილვით შენს წმიდას და უთხარი: „ვუბოძე დახმარება გმირს; ავამაღლე რჩეული ხალხისაგან;

²¹ვპოვე დავითი, მსახური ჩემი, და ჩემი წმიდა ზეთი ვცხე მას.

²²ჩემი ხელი წარმართავს მას, და ჩემი მკლავი განამტკიცებს მას.

²³ვერ დაჯაბნის მას მტერი, და ვერც ურჯულოების ძე დაჩაგრავს მას.

²⁴მოვსრავ მის წინაშე მის მოდავეთ, და მის მოძულეებს დავამხობ;

²⁵ჭეშმარიტება და წყალობა ჩემი მასთანაა და ჩემი სახელით ამაღლდება ღირსება მისი.

²⁶ზღვას გადავაწვდენ მის ხელს, და მდინარეებს — მის მარჯვენას.

²⁷ის მომიხმობს: ‘შენ მამა ხარ ჩემი, ჩემი ღმერთი და ბურჯი ჩემი ხსნისა.’

²⁸და მეც პირმშოდ დავადგენ მას, ქვეყნიერების მეფეებზე აღმატებულებას ვუბოძებ,

²⁹უკუნისამდე შევუნარჩუნებ წყალობას ჩემსას, და ჩემი აღთქმა მტკიცე იქნება მისთვის.

³⁰დავამკვიდრებ უკუნისამდე მის ნაშიერს და მის ტახტს, ვითარცა დღეებს ზეცათა.

³¹თუ მიატოვეს მისმა შვილებმა ჩემი რჯული და ჩემს სამართალს არ გაჰყვნენ,

³²თუ ჩემს წესდებებს დაარღვევენ და ჩემს მცნებებს არ დაიცავენ,

³³კვერთხით მოვკითხავ მათ დანაშაულს და გვემით — შეცოდებას.

³⁴მაგრამ ჩემს წყალობას არ მოვუშლი მას და არ გავაცრუებ ჩემს ერთგულებას.

³⁵არ უარვყოფ ჩემს აღთქმას და არ შევცვლი, რაც აღმოხდა ჩემს ბაგეებს.

³⁶ერთხელ შევფიცე ჩემი სიწმიდით; არ ვეცრუები დავითს.

³⁷მისი ნაშიერი მარადჟამს იქნება და მისი ტახტი, ვითარცა მზე, ჩემს წინაშე;

³⁸დამკვიდრდება მთვარესავით უკუნისამდე, და იქნება ჭეშმარიტი მოწმე ზეცაში.“

³⁹მაგრამ ახლა მიატოვე და შეიზიზღე, განრისხდი შენს ცხებულზე!

⁴⁰უგულებელჰყავ აღთქმა შენს მორჩილთან, მიწას დაანარცხე გვირგვინი მისი;

⁴¹მოშალე ყველა ზღუდენი მისნი; ნანგრევებად აქციე მისი სიმაგრენი.

⁴²ძარცვავს მას ყველა გამვლელ-გამომვლელი, მეზობლის დასაცინი გახდა;

⁴³მაღლა ასწიე მის მოშუღართა მარჯვენა, გაახარე ყველა მისი მტერი.

⁴⁴დააჩლუნგე მისი მახვილი და არ შეეწიე გამარჯვებით ომში;

⁴⁵გააცამტვერე სიწმიდე მისი და ტახტი მისი მიწასთან გაასწორე;

⁴⁶შეამცირე დღენი მისი სიჭაბუკისა, და სირცხვილით შემოსე იგი.

⁴⁷როდემდე დაგვეფარები, უფალო? ნუთუ მარადჟამს იგიზგიზებს ცეცხლივით შენი რისხვა?

⁴⁸გაიხსენე, რა არის ჩემი წუთისოფელი; როგორ ამაოებად შეჰქმენი ყოველი ძე კაცისა!

⁴⁹ვინ არის კაცი, რომ სიკვდილი არ იხილოს, და იხსნას სული თვისი ჯოჯოხეთის ხელთაგან?

⁵⁰სად არის შენი ძველი წყალობა, უფალო, დავითს რომ შეჰფიცე შენი ჭეშმარიტებით?

⁵¹გაიხსენე, უფალო, შენს მორჩილთა დამცირება, უბით რომ ვატარებ ძლიერ ხალხთაგან.

⁵²როგორ მწყევლიან შენი მტრები, უფალო, როგორ წყევლიან შენი ცხებულის კვალს.

⁵³კურთხეულ არს უფალი უკუნისამდე! ამინ, ამინ!