Read ქართული ბიბლია, სრული ვერსია Psalms 89 Bible Online

Psalms 89 - ქართული ბიბლია, სრული ვერსია bible

Psalms 89

¹ლოცვა მოსესი, ღვთისკაცისა. უფალო! შენ იყავი ჩვენი თავშესაფარი თაობებიდან თაობებამდე.

²ვიდრე მთები დაიბადებოდნენ და შექმნიდი დედამიწასა და სამყაროს, თვით უკუნითი უკუნისამდე შენა ხარ ღმერთი.

³კვლავ მტვრად აქცევ კაცს და ამბობ: დაბრუნდით, ძენო კაცთანო!

⁴რადგან ათასი წელი შენს თვალში, ვითარცა გუშინდელი დღე, რომ გადაიარა, ან ერთი გუშაგობა ღამისა.

⁵ღვართქაფივით გააქანებ მათ, სიზმარს ემსგავსებიან, ბალახს, რომელიც ფერს იცვლის ყოველ დილით:

⁶დილას ყვავის და განახლდება, საღამოს კი ჭკნება და ხმება.

⁷რადგან დავილიეთ შენი რისხვით და შენმა გულისწყრომამ შეგვაძრწუნა.

⁸ჩვენი დანაშაულებანი წინ დაიდე, ჩვენი საიდუმლო შეცოდებანი — შენი სახის შუქის წინ.

⁹რადგან ყველა ჩვენი დღე განილევა შენი რისხვით, ისე მიდის ჩვენი წლები, როგორც ერთი ამოსუნთქვა.

¹⁰ჩვენს წელთა რიცხვი 70 წელია, ჯანმაგრობის დროს კი — 80 წელი; და ამათგან უმეტესი ჯაფაა და არარაობა, სწრაფად მიქრიან და ჩვენც იქით მივფრინავთ.

¹¹ვინ იცის შენი რისხვის ძალა, და შენი მძვინვარება შენი შიშისამებრ?

¹²გვასწავლე ჩვენს დღეთა დათვლა, რათა შევიძინოთ გული სიბრძნისა.

¹³მობრუნდი, უფალო, — როდემდე ვიქნებით მიტოვებულნი? — ნუგეში ეცი შენს მორჩილებს!

¹⁴გაგვაძღე გარიჟრაჟზე შენი წყალობით, რათა ვიხაროთ და ვიმხიარულოთ ყოველთა დღეთა ჩვენთა.

¹⁵გაგვამხიარულე იმ დღეთა წილ, რომ დაგვტანჯე, იმ წელთა წილ, გაჭირვება რომ ვნახეთ.

¹⁶იხილონ შენმა მორჩილებმა შენი საქმენი და შენი ბრწყინვალება — მათმა შვილებმა.

¹⁷იყოს კეთილმოსურნეობა უფლისა, ჩვენი ღმერთისა, ჩვენდამი, და საქმე ჩვენი ხელისა წარმართე ჩვენთვის, და საქმე ჩვენი ხელისა წარმართე!