Read ქართული ბიბლია, სრული ვერსია Psalms 9 Bible Online

Psalms 9 - ქართული ბიბლია, სრული ვერსია bible

Psalms 9

¹გუნდის ლოტბარს, ლაბანის სიკვდილზე. ფსალმუნი დავითისა.

²მადლობას შეგწირავ შენ, უფალო, მთელი გულით, ვაუწყებ მთელ შენს სასწაულებს.

³ვიხარებ და ვილხენ შენით, ვუგალობებ შენს სახელს, უზენაესო.

⁴როდესაც დაბრუნდნენ ჩემი მტრები უკან, დამარცხდნენ და დაიღუპნენ შენს წინაშე;

⁵რადგან შენ გაარჩიე ჩემი დავა და სამართალი; დაბრძანდი ტახტზე, სიმართლის მსაჯულო.

⁶განრისხდი ერებზე, მოსპე ბოროტი, მათი სახელი წაშალე უკუნითი უკუნისამდე.

⁷მტერი გაქრა, გაპარტახდა სამუდამოდ, შენ დაანგრიე მათი ქალაქები, მათთან ერთად მოისპო მათი ხსენება.

⁸უფალი კი ტახტზე ზის უკუნისამდე. სამართლისათვის დაადგინა მან თვისი ტახტი.

⁹სიმართლით განსჯის სამყაროს, გაასამართლებს ხალხებს სისწორით.

¹⁰უფალი არის ჩაგრულის შემწე, დასაყრდენი გასაჭირის ჟამს.

¹¹შენ მოგენდობიან შენი სახელის მცოდნენი, ვინაიდან არ მიატოვებ, უფალო, შენს მაძიებლებს.

¹²უგალობეთ უფალს, სიონის მკვიდრს! აუწყეთ მისი საქმენი ხალხებს!

¹³რადგან ის იძიებს მათ სისხლს, ახსოვს ისინი, არ ივიწყებს ტვირთმძიმეთა გოდებას.

¹⁴შემიწყალე, უფალო, იხილე ჩემი შეჭირვება მოძულეებისაგან, გამომაბრუნე სიკვდილის კარიბჭიდან,

¹⁵რათა ვაუწყო შენი ქება, სიონის ასულის კარიბჭეებთან ვიხარო შენმიერი ცხონებით.

¹⁶ჩაცვივდნენ ერები თავიანთ ამოთხრილ ორმოში, მათ მიერ გამზადებულ ბადეში გაება მათივე ფეხი.

¹⁷გაცხადდა უფალი, ქმნა სამართალი; ბოროტი გაება თავისი ხელით დაგებულ მახეში.

¹⁸ჩაცვივდებიან ბოროტნი ჯოჯოხეთში, ყველა ერები, რომელნიც ივიწყებენ ღმერთს.

¹⁹სამუდამოდ არ იქნება დავიწყებული ღატაკი, არც უპოვართა იმედი დაიღუპება სამარადისოდ.

²⁰აღსდექ, უფალო, ნუ იმძლავრებს კაცი; გაასამართლე ერები შენს წინაშე.

²¹შიშის ზარი დაეცი მათ, უფალო! დაე შეიტყონ ერებმა, რომ მხოლოდ და მხოლოდ ადამიანები არიან ისინი!

²²რატომ დგახარ, უფალო, შორს? რატომ მარიდებ თვალს გაჭირვების ჟამს?

²³ქედმაღლად დევნიან ბოროტნი ღატაკთ; დაე შეპყრობილ იქნენ მზაკვრობით, რომელიც განიზრახეს.

²⁴რადგან ტრაბახობს ბოროტი თავისი სულის ავხორცობით, და ანგარების მოყვარული უარყოფს უფალს.

²⁵ბოროტი თავისი ქედმაღლობით არ ეძიებს მას, მისი აზრით არ არსებობს ღმერთი.

²⁶წარმატებულია მისი გზა ყოველ ჟამს; მიუწვდომელია შენი სამართალი მისთვის; სულის შებერვით ამარცხებს თავის მტრებს.

²⁷ამბობს თვის გულში: არ წავბორძიკდები, თაობიდან თაობამდე არ შემხვდება სიავე.

²⁸მისი პირი სავსეა წყევლით, სიცრუით და ჩაგვრით; მისი ენა — სიმრუდე და უკუღმართობაა.

²⁹ჩასაფრდება ეზოებს უკან, სამალავიდან კლავს უდანაშაულოს, მისი თვალები საწყლებს უთვალთვალებენ,

³⁰უდარაჯდება საფარში, როგორც ლომი შამბნარში, უსაფრდება საწყალს მოსატაცებლად; მოიტაცებს, ოდეს მოიმწყვდევს თავის ბადეში.

³¹მოიზნიქება, გაწვება და საწყლებს თავის ბრჭყალებში მოაქცევს.

³²ამბობს თვის გულში: დაივიწყა ღმერთმა, სახე დამალა, ვერ იხილავს ვერასოდეს.

³³აღსდექ, უფალო! ღმერთო, აღმართე ხელი, ნუ დაივიწყებ ჩაგრულებს.

³⁴რად უგულებელყოფს ბოროტი ღმერთს და ამბობს თვის გულში, რომ არ მოჰკითხავ?

³⁵მაგრამ შენ ხედავ; ხედავ წყენასა და შევიწროებას, რათა სამაგიერო გადაუხადო შენი ხელით, შენ განდობს თავის თავს ჩაგრული, შენ ხარ ობოლის შემწე.

³⁶გადაამსხვრიე ბოროტისა და უკეთურის მკლავი! გამოიძიე მისი ბოროტება, სანამ ვეღარც ერთს ვეღარ იპოვი!

³⁷უფალი ხელმწიფეა უკუნითი უკუნისამდე, აღიგვებიან წარმართნი მისი ქვეყნიდან.

³⁸უფალო, ისმინე მორჩილთა გოდება, შეამზადე მათი გული, მიაპყარ ყური;

³⁹მიეც სამართალი ობოლს და ჩაგრულს, რომ აღარ თესონ ადამიანებმა შიში ქვეყანაზე.