Read ქართული ბიბლია, სრული ვერსია Psalms 91 Bible Online

Psalms 91 - ქართული ბიბლია, სრული ვერსია bible

Psalms 91

¹ფსალმუნი. გალობა შაბათის დღისათვის.

²კარგია, მადლი შევწიროთ უფალს, და ვუგალობოთ დიდება შენს სახელს, უზენაესო!

³ვაუწყოთ დილ-დილობით შენი წყალობა და შენი ერთგულება — ღამ-ღამობით.

⁴ათსიმიანსა და ჩანგზე, ქნარზე გალობით.

⁵რადგან შენ გამახარე, უფალო, შენი საქმეებით, შენს ხელთა საქმეს ვუმღერებ ლხენით.

⁶რაოდენ ღრმაა შენი ზრახვანი, უფალო, რაოდენ დიდია შენი საქმენი!

⁷უგუნური კაცი ვერ შეიცნობს და უმეცარი ვერ გაიგებს ამას,

⁸რადგან თუმცა ბოროტნი ყვავიან ბალახივით, და სიმრუდის მოქმედნი იფურჩქნებიან, ისინი დაიღუპებიან სამუდამოდ.

⁹შენ კი მაღალი ხარ მარადჟამს, უფალო!

¹⁰რადგანაც, შენი მტრები, უფალო, რადგანაც აგერ შენი მტრები დაიღუპებიან, განიბნევა ყველა სიმრუდის მოქმედი.

¹¹მაგრამ შენ აამაღლებ რქას ჩემსას მარტორქის რქასავით, ახალ ზეთს მცხებ მე.

¹²ჩემი თვალი იხილავს ჩემი მტრების დაცემას, ჩემს წინააღმდეგ აღმდგარ ბოროტმოქმედებზე გაიგონებენ ჩემი ყურები.

¹³წმიდანნი კი ფინიკივით გაიფურჩქნებიან, ლიბანის კედარივით წამოიმართებიან.

¹⁴უფლის სახლში არიან დარგულნი, ჩვენი ღმერთის ეზოებში ყვავიან;

¹⁵სიბერეშიც გამოიღებენ ნაყოფს, წვნიანსა და ხასხასას;

¹⁶რათა გაცხადდეს, რომ მართალია უფალი; ის არის ჩემი საყრდენი, და არ არის მასში უსამართლობა.