Read ქართული ბიბლია, სრული ვერსია Proverbs 11 Bible Online

Proverbs 11 - ქართული ბიბლია, სრული ვერსია bible

Proverbs 11

¹მრუდი სასწორი სძულს უფალს, ზუსტი საწონები კი — სათნოა მისთვის.

²ამპარტავნებას დამცირება მოჰყვება, სიბრძნე კი თვინიერებთან არის.

³გულმართალთ უბიწოება წარმართავს, ვერაგებს კი მათივე ცბიერება ღუპავს.

⁴სიმდიდრე უსარგებლოა სასჯელის დღეს, სიმართლე კი იხსნის სიკვდილისაგან.

⁵სიმართლე წარმართავს უბიწოს გზას, უკეთური კი თავისი უკეთურების მსხვერპლია.

⁶გულით წრფელთ მათი სამართლიანობა იხსნის, მზაკვართ კი მათივე ზრახვები დაატყვევებს.

⁷უკეთურ ადამიანთა სიკვდითან ერთად ისპობა მათი იმედები და უღმრთოთა სასოება ქარწყლდება.

⁸მართალი უბედურებას აირიდებს, უკეთური კი ჩავარდება მასში.

⁹უღმერთო თავისი ენით ღუპავს მოყვასს, მართალნი კი ცოდნით გადარჩებიან.

¹⁰მართალთა კეთილდღეობისას ხარობს ქალაქი და უკეთურთა დაღუპვისას ზეიმობს.

¹¹წრფელთა კურთხევით ამაღლდება ქალაქი, უკეთურთა პირით კი ინგრევა.

¹²ვინც მოყვასს ამცირებს, სულელია, გონიერი კაცი კი დუმს.

¹³ორპირი კაცი საიდუმლოს გასცემს, ერთგული კი საიდუმლოს ინახავს.

¹⁴გონიერი წარმართვის გარეშე ერი იღუპება, მრავალი მრჩეველი კი უსაფრთხოებას უზრუნველყოფს.

¹⁵უცხოს თავმდები საკუთარი თავის მტერია, ის კი, ვინც თავმდებად არ დგება, უსაფრთხოდ არის.

¹⁶სათნო ქალი პატივს იხვეჭს, უკეთური კი სირცხვილს მოიგვრის.

¹⁷მოწყალე კაცი სიკეთეს მიუზღავს თავის სულს, უმოწყალო კი თავს იღუპავს.

¹⁸უღმერთო ნამდვილ ჯილდოს ვერ მიიღებს, მოწყალების მთესველი კი ჭეშმარიტ საზღაურს ეწევა.

¹⁹სიმართლეს კაცი სიცოცხლისკენ მიჰყავს, ბოროტების მადევარს კი სიკვდილი ელის.

²⁰გულმრუდნი სძულს უფალს, უმწიკვლოთა გზა კი სათნოა მისთვის.

²¹იცოდე, უკეთურს სასჯელს არ ასცდება, მართალნი კი გადარჩებიან.

²²ლამაზი, მაგრამ უგუნური ქალი იგივეა, რაც ღორის დინგზე წამოცმული ოქროს რგოლი.

²³მართალთა საწადელი კეთილად ბოლოვდება, ურჯულოთა მოლოდინი — რისხვით.

²⁴ზოგი უხვად გასცემს და უფრო ემატება, ზოგი კი თავს იკავებს გაცემისაგან და მაინც აკლდება.

²⁵ქველმოქმედი გამდიდრდება, და ვინც სხვას ასმევს, მწყურვალი არ დარჩება.

²⁶ხორბლის დამჭერს წყევლის ხალხი, გამცემის თავზე კი კურთხევაა.

²⁷ვინც სიკეთეს ეძიებს, მადლს ჰპოვებს, ბოროტების მაძიებელს კი ბოროტება ეწევა.

²⁸თავისი სიმდიდრით დაიმედებული დაეცემა, მართალნი კი მწვანე ფოთლებივით გაიშლებიან.

²⁹თავისი სახლის გამჩანაგებელი ქარს დაიმკვიდრებს, ხოლო სულელი — ბრძენის მონობას.

³⁰მართლის ნაყოფი სიცოცხლის ხეა, ძალადობა კი სიცოცხლეს სპობს.

³¹მართალს ამქვეყნად მიეზღვება, და მითუმეტეს მიეზღვება საკადრისი უკეთურსა და ცოდვილს!