Read ქართული ბიბლია, სრული ვერსია Proverbs 15 Bible Online

Proverbs 15 - ქართული ბიბლია, სრული ვერსია bible

Proverbs 15

¹მშვიდი პასუხი რისხვას აცხრობს, შეურაცხმყოფელი სიტყვა კი ბრაზს იწვევს.

²ბრძენთა ენა ცოდნის სიკეთეს გვიჩვენებს, უმეცართა პირი კი სისულელეს აფრქვევს.

³უფლის თვალი ყველაფერს სწვდება; ის ხედავს ბოროტთაც და კეთილთაც.

⁴მშვიდი ენა სიცოცხლის ხეა, მზაკვარი კი სულის შემმუსვრელია.

⁵სულელი აბუჩად იგდებს მამის დარიგებას; შეგონების დამცველი კი წარმატებულია.

⁶მართლის სახლში დიდძალი განძია, უკეთურის მონახვეჭს კი უბედურება მოსდევს.

⁷ბრძენთა ბაგენი ცოდნას ავრცელებენ, ეს არ შეუძლია ბრიყვთა გონებას.

⁸უკეთურთა მსხვერპლი სისაძაგლეა უფლის წინაშე, მართალთა ლოცვა კი სათნოა მისთვის.

⁹უფლის წინაშე სისაძაგლეა უკეთურის გზა, სიმართლის გზით მოარული კი უყვარს მას.

¹⁰გზას აცდენილი მკაცრ სასჯელს მიიღებს, მხილების მოძულე კი დაიღუპება.

¹¹შავეთი და ჯოჯოხეთი ღიაა უფლის წინაშე, მით უფრო — ადამიანთა გული!

¹²ურჯულოს სძულს მხილება, ბრძენთან არ წავა იგი.

¹³მხიარული გული სახეს ახალისებს, გულის სევდა კი გულგატეხილობას იწვევს.

¹⁴გონიერი გული ცოდნას ეძებს, ბრიყვის პირი კი სისულელით იკვებება.

¹⁵ღატაკის ყოველი დღე სევდით არის სავსე, გულმხიარულს კი მუდამ ზეიმი აქვს.

¹⁶სჯობს მცირე უფლის შიშით, ვიდრე დიდი საუნჯე ელდით და შფოთვით.

¹⁷სჯობს ბოსტნეული და სიყვარული, ვიდრე მსუქანი ხარი და სიძულვილი.

¹⁸ფიცხი შფოთს ტეხს, სულგრძელი კი შუღლს აქრობს.

¹⁹ზარმაცის გზა ეკალ-ბარდებიანია, პატიოსანთა გზა კი ფართოა.

²⁰ბრძენი შვილი მამას ახარებს, ბრიყვი კი დედის შემარცხვენელია.

²¹სისულელე უგუნურის სიხარულია, გონიერი კი სწორი გზით დადის.

²²რჩევის გარეშე ჩანაფიქრი იფუშება, მრავალ მრჩეველს კი წარმატება მოაქვს.

²³სწორი პასუხი ადამიანის სიხარულია, რა კარგია დროზე ნათქვამი სიტყვა!

²⁴გონიერის ცხოვრების გზა აღმავალია, რათა ქვევით შავეთს განერიდოს.

²⁵ამპარტავანთა სახლს ანგრევს უფალი, ქვრივის საზღვრებს კი ამაგრებს.

²⁶ბოროტთა განზრახვანი სისაძაგლეა უფლის წინაშე, მართალთა სიტყვები კი საამოა მისთვის.

²⁷უსამართლო მოგებას დახარბებული თავის სახლს ანგრევს, ქრთამის მოძულე კი იცოცხლებს.

²⁸მართლის გული პასუხს წონის, უკეთურთა პირი კი ბოროტებას აფრქვევს.

²⁹უფალი შორსაა უკეთურთაგან, მართალთა ლოცვას კი შეისმენს.

³⁰თვალთა სინათლე გულს ახარებს და კარგი ამბავი ძვლებს აპოხიერებს.

³¹მაცოცხლებელი მხილების შემწყნარებელი ყური ბრძენთა შორის დაივანებს.

³²სწავლის უარმყოფელს თავისი სული სძულს, მხილების შემწყნარებელი კი გონიერებას იხვეჭს.

³³უფლის შიში სიბრძნის სწავლაა და მორჩილება წინ უძღვის დიდებას.