Read ქართული ბიბლია, სრული ვერსია Proverbs 25 Bible Online

Proverbs 25 - ქართული ბიბლია, სრული ვერსია bible

Proverbs 25

¹ესეც სოლომონის იგავებია, იუდას მეფის, ეზეკიას ვეზირების შეკრებილი:

²საქმეთა დაფარვა ღმერთის დიდებაა, საქმის გამოკვლევა კი — მეფის დიდება.

³ისევე როგორც ზეცის სიმაღლე და მიწის სიღრმე, მეფეთა გულიც შეუცნობელია.

⁴მოაშორეთ წიდა ვერცხლს და გამოჭედავს ოქრომჭედელი ჭურჭელს.

⁵მოაშორეთ მეფეს უკეთური და მისი ტახტი სიმართლით განმტკიცდება.

⁶ნუ განიდიდებ თავს მეფის წინაშე და დიდებულთა ადგილზე ნუ დადგები;

⁷სჯობს გითხრან: „ზემოთ ამოდი“, ვიდრე დაგამცირონ დიდებულის წინაშე. როგორც კი რაღაცას დაინახავ,

⁸უმალ ნუ გაიქცევი სასამართლოში, თორემ ბოლოს რას იზამ, შენი მეზობელი თუ შეგარცხვენს?

⁹დავით კი ედავე შენს მეზობელს, მაგრამ სხვის საიდუმლოს ნუ გასცემ,

¹⁰თორემ ვინც გაიგებს, გაგკიცხავს და სახელი გაგიტყდება.

¹¹მოსწრებული სიტყვა ვერცხლით მოვარაყებული ოქროს ვაშლებს ჰგავს.

¹²ოქროს საყურეა და ბაჯაღლოს სამკაული ბრძენის შეგონება გამგონე ყურისთვის.

¹³რაც თოვლის სიგრილე იქნებოდა მკის დროს, ის არის ერთგული მაცნე მისი გამგზავნისათვის, ის მას სულს უგრილებს.

¹⁴ფუჭი ძღვენით მოტრაბახე კაცი იგივეა, რაც ღრუბელი და ქარი წვიმის გარეშე.

¹⁵მოთმინებით შეიძლება მთავრის მოდრეკა, და წყლიანი ენა ძვალს დაამსხვრევს.

¹⁶თაფლს თუ იპოვი, ზომაზე ჭამე, თორემ მუცლის გვრემით უკან ამოარწყევ.

¹⁷ფეხი დააძვირე შენი მოძმის სახლში, თორემ მობეზრდები და შეგიძულებს.

¹⁸კაცი, რომელიც ცრუდ მოწმობს მოყვასის წინააღმდეგ, შუბი, მახვილი და ბასრი ისარია.

¹⁹როგორც ჭიანი კბილი და დადამბლავებული ფეხი, ასევე არ არის სანდო ღალატიანი კაცი გასაჭირში.

²⁰სიცივეში ტანსაცმლის წაგლეჯას და ჭრილობაზე ძმრის დასხმას ჰგავს ნაღვლიანისთვის მხიარული სიმღერის მღერა.

²¹თუ შენი მტერი მშიერია, დააპურე; თუ სწყურია, წყალი მიაწოდე,

²²რადგან ამით ნაკვერცხლებს შეაგროვებ მის თავზე და უფალი მოგიზღავს შენ.

²³ჩრდილოეთის ქარი თავსხმას იწვევს და ენის აყოლა — მრისხანე მზერას.

²⁴სხვენის კუნჭულში ცხოვრება სჯობია ანჩხლ დედაკაცთან ერთად ცხოვრებას.

²⁵რაც ცივი წყალია მწყურვალისათვის, ის არის კარგი ამბავი შორი ქვეყნიდან.

²⁶რაღა ამღვრეული ნაკადული და გაბინძურებული წყარო, და რაღა ბოროტის წინაშე წაფორხილებული მართალი.

²⁷ბევრი თაფლის ჭამა არაა კარგი, და არც ზედმეტი დიდების ძიება.

²⁸რაღა უგალავნო ქალაქი და რაღა კაცი, რომელიც საკუთარ თავს ვერ მართავს.